Shillong, Naitung 01
Ka jingslem ban pyntreikam ïa ki aiñ ka ban ïada ïa ka jingrung kyrthep ki briew ba nabar, ka la pynlong ïa ka Khasi Students’ Union (KSU) ban ïakynduh markhmat ïa u Myntri Rangbah Conrad K Sangma bad pynpaw ba lada ka Sorkar kam leh eiei, ka seng kan sa pyntreikam hi noh ïa ki kyndon ki ban ïada ïa ka jingshngaiñ jong ka Jaidbynriew.
U President ka KSU CEC u Samla Raymond Kharjana haba kren sha ki nongthoh khubor u la ïathuh ba ka mat ba hakhmat duh ba ka seng ka la ïakren ka long halor ka jingslem ban pyntreikam ïa ka Inner Line Permit (ILP) hapoh ka Jylla ha kaba u Myntri Rangbah u la pynpaw ïa ka kynhun ba kane ka jingdawa ka dei kaba la sahteng ha ka Sorkar Pdeng.
U Samla Raymond u la ïathuh ba u Myntri Rangbah u la kular ba ka Sorkar Jylla ruh ka bteng ban buddien kumjuh ban tynruh sha ka Sorkar Pdeng haba ïadei ban pyntreikam noh mardor ïa ka ILP hapoh ka Jylla Meghalaya.
Nalor ka mat ILP u la ïathuh ba ka KSU ka ïoh ruh ban ïakren haba ïadei ka jingpyntreikam ïa ka Meghalaya Residents Safety and Security Act 2016 (MRSSA), “Ngi la ïakren ïa ka kam ba ïadei bad ka MRSSA ba ha ki khyndiat sngi ba la leit, ka la don ka jingpyrshang ban pynkylla ïa ki Facilitation Centre, lane ka khyrdop ba pynthikna ïa ka rung ba mih kiba wan nabar sha ki Food Court. Ngi la kren shai ïa ka nongrim jong ngi halor kane ka kam, ngin ym ailad ïa kino-kino ki seng lane ka Sorkar ban pynkylla ïa ki Facilitation Centre sha ki Food Court” u la ong.
Shuh-shuh u la ong ba ïa kane ka aiñ ym pat pyntreikam satia wat hadien phra snem ba la mynjur ïa ka. “Ka la don ka jingpynslem shaba palat ha ka ban pyntreikam ïa ka. U Myntri Rangbah u la pynpaw ïa katto katne ki jingeh bad ong ba kane ka kam ka ïatyngkhuh bad ki aiñ jong ka Sorkar Pdeng bad ka la sah teng ban ïoh jingmynjur na u Lat” la ong u Samla Raymond.
U Samla Raymond u la pynkynmaw ba ka seng ka la dep ban ai jingmut sha ka Sorkar ban pynrung katto katne ki kyndon haba ïadei ban pynkhlaiñ ïa ka jingpyntreikam ïa ka Meghalaya Identification, Registration (Safety and Security) of Migrant Workers Act, 2020, ha kaba u Myntri Rangbah u la kular ban sdang ban pyntreikam ïa kane ba ki nongbylla kiba wan nabar ki dei ban don ka syrnod jingpynshisha jong ki pulit (Police Verification).
“Haduh mynta, ngim pat ïohi ïa kano-kano ka aiñ ka ban khang ïa ka jingwan rung kyrthep ki briew ba nabar sha Jylla. Lada ngi ïakren halor ka ILP, ka jubab ka long ba kane ka kam ka sahkut bad ka Sorkar Pdeng. Lada ngi ïakren halor ka MRSSA, ngi ïoh ïa kajuh ka jubab. Lada ngi ïakren halor ka Migrant Workers Act, ka long hi kumjuh” la ong u Samla Raymond.
U la maham jur ba lada ka Sorkar Jylla kam lah ban pyntreikam ïa kine ki aiñ ki ban ïada ïa ka jinglong kyrpang jong ka jaidbynriew bad jong ki trai ri trai muluk, ka seng kam banse ban shim ïa ki sienjam ban pyntreikam hi ïa kine ki aiñ dalade ban ïada ïa ka jingmyntoi jong ka jaidbynriew trai muluk.
