Shillong, Naitung 01
Kum ka dak jong u mawmer ba kongsan ha kaba pynkhlaiñ ïa ki lad kamai jakpoh ha ki jaka nongkyndong bad ban kyntiew ïa ka jingthmu na ka bynta ki jaka nongkyndong jong ka ri India kiba la kiew, ka Viksit Bharat – Guarantee for Rozgar and Aajeevika Mission (Gramin) [VB-G RAM G] Act, 2025 ka la treikam ha baroh kawei ka ri naduh ka sngi Balang. Da ka jingsdang jong kane ka aiñ, ki longïing ha ki jaka nongkyndong kiba dei hok ban ïoh bynta mynta kin ïoh ïa ka hok katkum ka aiñ ban ïoh 125 sngi ka jingtrei kaba ïoh jingsiew kaba la pynthikna.
Ka ain ka ïaleh ban pynlong ïa ka jingïoh kam ïoh jam ha ki jaka nongkyndong kaba kham biang, kaba shai bad kaba ïadei bad ka jingmih katba ka pynsted ïa ka jingwanrah ïa ki jingdon jingem kiba ïaineh ha ki jaka nongkyndong, ka jingpynneh pynsah ïa ki jingdon jingem ka mariang, ka jingkyntiew ïa ka jingmih ha ka rep ka riang, ka jingkyntiew ïa ka kamai kajih bad ka roi ka par kaba ïalam da ki kynthei.
Da ka jingtreikam kane ka aiñ, ka Sorkar India ka la pynbna ruh ïa ki dor bai bylla ba la pynkylla hapoh ka VB-G RAM G, 2025 na ka bynta baroh ki Jylla, ki Union Territory bad ki jaka ba la pyntip na ka bynta ka bai bylla. Kumta, ym don ka jingsiew bai bylla ba la pynbna ha kano-kano ka jaka ha ka ri ka ban duna ïa ka T.300. Ka bai bylla ba la pynbna ha ka ri baroh kawei ka la kiew na ka T.298.8 shisngi sha ka T.327.4 shisngi, kaba pyni ïa ka jingkiew kaba palat ïa ka 10 percent.
Ban pynthikna ïa ka jingpyntreikam kaba ïaid beit ïaid ryntih ïa ka aiñ naduh ka sngi kaba nyngkong, ka Sorkar ka la dep pyllait ïa ka mang tyngka ba shipor kaba T.95,692.31 klur sha ki Jylla bad ki Union Territory ban pynsuk ïa ka jingpynmih ïa ki lad ïoh kam khlem jingthut, ka jingsiew ïa ka bainong ha ka por bad ka jingpyntreikam ïa ki kam pynroi. U Myntri Sorkar Pdeng ba dei khmih ïa ka Tnad Rural Development and Agriculture & Farmers’ Welfare, u Shivraj Singh Chouhan u la ong, kane ka dei ka sngi kaba kongsan bad kaba ym pat ju jia mynno-mynno ruh na ka bynta ki jaka nongkyndong jong ka ri India. U la ong ba hapoh ka jingïalam u Myntri Rangbahduh ka ri u Narendra Modi, ka VB-G RAM G Act kam dei tang ka aiñ kaba thymmai hynrei kadei ka sienjam kaba wanrah jingkylla kaba wanrah ïa ka juk kaba thymmai jong ka burom, ka jingburom ïalade bad ka jingshngaiñ ha ka kamai kajih na ka bynta ki million ngut ki nongtrei ha ki jaka nongkyndong. U la ong ba ki longïing ha ki jaka nongkyndong kiba dei hok ban ïoh bynta mynta kin ïoh ïa ka hok katkum ka aiñ ban ïoh kam na ka bynta 125 sngi ha ka jaka jong ka 100 sngi. U Chouhan u la ban jur ba ka jingthmu ba kongsan jong ka Sorkar ka long ban pynthikna ba yn ym don uwei ruh u nongtrei ha ki jaka nongkyndong uba dei hok ban ïoh ba un duh kam wat tang shi sngi ruh. U la bynrap ruh ba ka Sorkar Pdeng bad ki Jylla ki la pyndep ïa baroh ki jingpynkhreh ha ka liang ka jingpynïaid kam, ka pisa tyngka bad ka teknoloji na ka bynta ka jingpyntreikam kaba ïaid beit ïaid ryntih ïa kane ka aiñ. Haba pynpaw ïa ka jingshaniah ha kane ka sienjam, u la ong ba kan plie ïa ki lad kamai jakpoh kiba thymmai ha ki shnong ki thaw, kan pynsted ïa ka jingthaw ïa ki jingdon jingem kiba ïaineh, kan pynkhlaiñ ïa ka jingpynkupbor ïa ki kynthei bad kan ai ka bor ba thymmai ïa ka jingthmu jong ka Atmanirbhar bad Viksit Rural India. U la kyntu ruh ïa baroh ki nongshong shnong ban long ki nongïatreilang ban tei ïa ki shnong kiba riewspah, kiba la pynkupbor bad kiba lah ban kyrshan ïalade.
Ban rakhe ïa ka jingpyntreikam ïa ka VB-G RAM G Act, 2025 ha ka ri baroh kawei, yn pynlong ïa ka prokram plie paidbah ha ka ri baroh kawei ha ka 2 tarik Naitung 2026 ha ka shnong Mukkavaripalle, Obulavaripalle Mandal, Tirupati District, Andhra Pradesh. Ha ka prokram plie paidbah ha ka ri baroh kawei yn don ka jingplie paidbah ïa ka VB-G RAM G, ka jingsam ïa ki Rural Employment Guarantee Card sha ki nongïoh jingmyntoi, ka jingplie paidbah ïa ka rynsan VB-G RAM G software, ka jingpyllait ïa ki kot ba kongsan, ka jingïakren bad ki nongïoh jingmyntoi, bad ka jingplie ïa ki katto katne ki sienjam kiba thmu ban pynthikna ïa ka jingpyntreikam kaba paka ïa ka aiñ.
