Shillong, Nailur:
Ka long kaei-kaei kaba phylla bad bym lah ngeit ba ki ophisar kim tip ïa ka jingheh jong ka lama India kaba la pynher ha Barik bad kaba lah ruh ban ïohi shynna bha wat na ki jaka kiba kham na jngai.
Ïa kane ka lama lai rong jong ka ri la kyntiew shajrong duh jong u post uba jrong kumba 40 metre bad ïa une u post la plie da u Myntri Rangbah u Conrad K Sangma ha Barik ha ka Sngi Ba-ar.
Haba ki nongthoh khubor ki la leit ban kylli na kiba bun ngut ki ophisar kiba don ha katei jaka, uwei u ophisar u la ngiat sha uwei pat kum ka nuksa ki ophisar ka PWD ki la ngiat sha ki ophisar ka tnat Pynroi Sor kaba dei peit ïa kane ka projek.
Ynda la ïakynduh ïa uwei na ki ophisar ka tnat pynroi sor u la sdang ban batai ïa ka jingheh jong ka lama hynrei ma u ruh tang shipor u la artatien noh ban batai bad u la shu antad ba ka jingheh ka lama ka lah ban dei 40 la 30.
Wat haba ki lad pathai khubor ki la ap kham slem ha katei ka jaka ban ïoh jingtip kaba tikna, hynrei ym don satia mano-mano na ki ophisar ka tnat pynroi sor kiba wan ban ïathuh ïa ka jingheh kaba tikna jong ka lama ka ri kaba la pynher ha katei ka jaka.
Ha kawei pat ka liang, ka tyllong khubor ka ïathuh ba ka lama kaba la pynher ha Barik ka don ïa ka jingheh kaba long 45 phut ka lynter bad 30 phut ka pyngkiang.
