Nongpoh, Nailur 06
Ka jingpyrshah jong katto-katne ki paidbah nongshong shnong ïa ka jingthmu jong ka Sorkar ban shna ïa ka surok ‘4-Lane’ kaba pynïasoh na lad Umïam shaduh sha Malidor ha Umroi Madan halor ka jingkam ba ka lah ban pynduh ïa ka tyllong umbam-umdih jong ka shnong kumba la mih ha ki lad pathai khubor ha kine ki khyndiat sngi bad taïew ba la dep, ka la pynlong ïa ki trai jaka ban pynpaw ïa ka jingsngewsih bad sngew-khia jur da kaba kynnoh ruh ba kitei ki ‘riew ieid mariang ki mih tang ha ka por ba ïoh skhim.
U Bah Shalan Sylliang uba dei u hynmen jong ka Kong A. Sylliang, ba dei trai ïa ka jaka kaba don katei tyllong um hapoh ka shnong Umroi Madan, u la ong ba baroh shi katta na ka liang jong ki, kum ki trai jaka, ki la shu sngap kumto, hynrei kumba kane ka mat ka la nang klang bad nang heh kat nang mih ki sngi ki por, kat haduh ba u MP ka Shillong, u Dr. Ricky A.J. Syngkon u la hap ban leit jurip dalade ïa katei ka jaka, bad ka jingshah kynthoh jong ka kur Sylliang, kumta kim banse ban mih shakhmat ban pynshai sha ki paidbah.
Utei u rangbah u la ong ba ka long kaba sngewlyngngoh ba ki don katto-katne ki ‘riew rangbah kiba pynpaw shakhmat ka pyrthei lyngba ki lad pathai khubor, kiba ki la pynmih ruh ïa ka Kur Sylliang ha kaba u la kyntu ba kin kiar ïa ka jingthad madan ïa ka kur, namar na ka liang jong ki hi kim don jingïadei eiei ruh bad kata ka kam ‘4-Lane’.
U Bah Shalan Sylliang u la pyntip ruh kum ki trai jaka, ha u snem 2022 hapoh ka jinglong Rangbah Shnong jong u Bah S. Thabah, ki la ai sngewbha da ka jingieid ïa katei ka tyllong um na ka bynta ka jingbit jingbiang jong baroh ki paidbah nongshong shnong ryngkat ki jingïakut ba ka shnong kan pynshna surok ïa katei ka jaka lyngba ka skhim 100 sngi bad ruh ba kin pynthung dieng ha katei ka jaka. Hynrei kat haduh kine ki sngi, kitei ki jingïakut ki khlem urlong satia, la ïathuh u Bah Shalan Sylliang.
U la ong ba kum ki trai jaka ki dap da ka jignsngewdiaw bad sngewsih ba ki la don ki ‘riew rangbah kiba la mih ban kren sha ki lad pathai khubor, la ïohi kumba ki la klet ba ïa katei ka tyllong la long trai da ka Kong A. Sylliang, kaba dei ka para khatduh jong u bad kam pynban ba ka dei ka jaka jong ka Dorbar Shnong Umroi Madan, kiba la leit ban ïalam ruh wat ïa ki nongthoh khubor sha katei ka jaka khlem ka jingïoh jingbit na ki, kum ki trai jaka da kaba bynrap ba nangne shakhmat ka jingkyntu bad jingmaham ka long ba kim dei shuh ban ïaid lyngba sha katei ka jaka khlem ka jingïoh jingbit na ki, kiba dei ki trai jaka.
“Kaba kyndit bad sngewlyngngoh ka long ba mynta, kita ki ‘riew ieid mariang baroh shi katta ki jah shaei, hynrei tad ynda haba la wan kane ka skhim ‘4-Lane’, mynta ngi ïohi ïa kitei ki ‘riew ieid mariang ba ki ieid mariang, hynrei tang uwei u dieng ruh kim shym la wan ban thung ha katei ka jaka ka jong ngi,” la kynthoh u Bah Shalan Sylliang pyrshah ïa katto-katne ki paidbah nongshong shnong kiba la mih ban pyrshah bad ong ruh ba man ka por ka ju don ka jingthang ïa ki khlaw ki btap ha katei ka jaka, hynrei ym don satia kiba mih shakhmat ban pyrkhat shaphang katei ka jaka bad ka mariang sawdong sawkun, hynrei tad haduh ba la wan kane ka skhim ‘4-Lane’, ki la mih shakhmat ban pynpaw ïa kata ka jingieid mariang jong ki.
“Phi ruh wat nym bishni ba katei ka surok kan wan ha ka jaka ka jong ngi, namar lada ngin ong ïa phi to pynïoh skhim surok ïa katei ka jaka jong ngi ruh phin ym lah hi, haduh mynta ngim pat ïoh surok namar ka dei ka jaka kaba long lum bad jngai na ka surok bah bad ïa ka um kaba phi dih ruh, ngim ym tuklar hi bad ïa ka surok kaba ngi ïoh ruh phim dei ban khang,” la ong u Bah Shalan Sylliang.
Utei u rangbah u la pynshai ruh ba ha ka jingïakren bad u Deputy Commissioner ka Ri-Bhoi ha ki por kiba la dep, la sngewthuh ba katei ka tyllong um kan ym ngat satia ha ka laiñ jong katei ka jingthmu shna surok ‘4-Lane’, naba kan ïaid na ki bynta ba sharum jong ka ranab lum bad kum ki trai jaka ruh kim kwah hi ban pynduh ïa katei ka tyllong um kaba u Blei u la kyrkhu kyrdoh.
Halor kane ka bynta, u Bah Shalan Sylliang, u la kyntu ïa ki katto-katne ki ‘riew rangbah kiba pyrshah ba kim dei satia ban tuklar ïa katei ka jingwan jong ka surok ‘4-Lane’ lyngba katei ka jaka ka jong ki, da kaba byrthen ba lada ki dang ïai bishni bad nang ïai tuklar, na ka liang ka jong ki, kum ki trai jaka, kim banse ban pynduh noh ïa ka jingai um sha ka shnong Umroi Madan hi baroh kawei lada kitei kiba pyrshah kim don ïa ka jingïaburom mar kylliang.
