Khliehriat, Nailur 06
Ka MLA ka Sutnga-Saipung konstitwensi, ka Kong Santa Mary Shylla ha ka 6 tarik Nailur ka la sam ïa ki ‘Tablet’ sha ki nongtrei ASHA bad ASHA ‘Facilitator’ jong ka East Jaiñtia Hills District ha ka jingïalang kaba la long ha Conference Hall jong ka DC ophis.
Nalor ka MLA, ha kane ka sngi la donlang ruh u Deputy Commissioner ka East Jaiñtia Hills District, u Shivansh Awasthi, ka Additional Deputy Commissioner, East Jaiñtia Hills District, ka Kong J.U. Kharpuri, Assistant Commissioner, East Jaiñtia Hills District, Dr. D. Shylla bad kiwei-kiwei ki nongtrei ka koit ka khiah.
Ka Kong Santa Mary Shylla ha ka jingkren ka pynpaw ka jingsngewnguh ïa ka jingnoh synñiang jong ki ASHA bad ASHA ‘Facilitator’ sha ka tnad ka koit ka khiah bad ai khublei kyrpang ruh ïa ka jingtrei shitom kaba khlem sangeh jong ki ban kyntiew ïa ka koit ka khiah na ka bynta ka bha ka miat jong ka imlang sahlang.
Ka Kong Shylla ka la kren ruh halor ka jingshimkhia jong ka Sorkar ban pynbiang ïa ki ASHA bad ASHA ‘Facilitator’ bad ki nongpynïaid ASHA da ki ‘Tablet’ khnang ban pynsuk ïa ka rukom phah kaiphod nalor kiwei-kiwei.
Haba kren halor ka jingnoh synñiang jong ki ASHA ban ïarap ïa ki longkmie ha ka por kha khun, ka Kong Santa ka la pynshlur ïa ki ASHA ban hikai ruh ïa ki briew ha la ki jong ki shnong haba ïadei bad ka jingkordor jong ka jingkoit jingkhiah bad ban pynshlur ruh ïa ki longkmie ban jied ïa ka jingkha khun ha ki jaka sumar.
Shuh shuh ka la kyntu ïa ki ASHA ban pyndonkam hok ïa ki lad jingïarap ba la ai da ka Sorkar na ka bynta ban kyntiew ïa ka koit ka khiah jong ki nongshong shnong ka Jylla.
Kiwei kiba la ai jingkren ki kynthup ïa u District Medical and Health Officer, East Jaiñtia Hills District, u Dr. D. Shylla, DSO ‘in-charge’ (IDSC) cum District Nodal Officer (NP-NCD/CPHNC/NPCCHH/NRCP), East Jaiñtia Hills District, Dr. Luckystar Sungoh bad District Immunization Officer incharge, East Jaiñtia Hills District, Dr. N.P Suchiang.
