Shillong, Nailur 06
Wat lada ka National People’s Party (NPP) bad ka All India Trinamool Congress (AITC) ki la dep ban pynbna kyrtong ban ïakhun ïa ka ilekshon MLA shiteng samoi na Gambegre konstitwensi, hynrei ka Bharatiya Janata Party (BJP) bad ka Congress kaba ap khmih ban ïoh bat biang ïa kane ka konstitwensi kim pat rai ïano kin phah ïakhun kum ki kyrtong.
Ka Gambegre konstitwensi ka dei kaba la bat da ka Congress ha ka ilekshon MLA 2023 lyngba u Saleng A Sangma uba la mihkhmat kum u MLA ïa kane ka konstitwensi la lai sien kynthih, hynrei u la iehnoh hadien ba u la shahjied kum u MP ka Tura konstitwensi.
Ka BJP kaba la pynkhreh ban ïakhun kam pat pynbna kyrtong wat lada ka kyrteng jong u MDC ka Tura u Bernard Marak ka la sawa bha ba un long u kyrtong.
U nongïalam ka BJP, u Bah A.L Hek u la ong ba ka seng kam pat dep ban shim rai halor ka jingjied ïa u kyrtong namar bym pat pynbna ïa ka ilekshon shiteng samoi lano yn pynlong.
Ka Congress ka la bynshet beit ha u MP ka Tura ban ai jingmut mano ba kham biang ban long u kyrtong namar ba u tip kham bha ïa ka konstitwensi kaba u la ju mihkhmat khnang ba ka Congress kan nym duh ban bat ïa kane ka konstitwensi.
Ka National People’s Party (NPP) ka la pynkhreh ban phah ïakhun da ka Mehtab Chandee Sangma ka kurim jong u Myntri Rangbah u Conrad K Sangma katba ka AITC kan phah ïakhun da ka MDC na Dengnakpara ka Sadhiarani Sangma kaba dei ka kurim jong u MLA barim, u Zenith Sangma.
