Shillong, Nailur:
U President ka Hynñiewtrep Youths’ Council (HYC) West Khasi Hills District, Bah Lumlang Kharsyiemlieh u la ong ba ki Nepali kiba sah ha Meghalaya kiba kwah ban hap noh sha Assam kin sngewbha ban mih noh hynrei kim dei ban kam trai ïa ka khyndew ka shyïap.
Ha kine ki khyndiat sngi la don kiwei ki jaidbynriew kiba sah ha Langpih Sector ba ki kwah ban hap sha Assam katba ka jingpynkhreh jong ki ar tylli ki jylla ka Assam bad Meghalaya ïa ki thmu ban pynbeit noh ïa u pud u sam.
U Bah Lumlang u la ong ba haduh mynta kam pat don ka jingïakren ha ka committee ba ki sengbhalang ba kin pdiang ïa ki Nepali hynrei lada kim kwah ban sah ha Meghalaya ki dei ban mih noh.
U la ong ba kumno kita ki Nepali kiba sah ha thaiñ Langpih kin kwah ban leit sha Assam haba dang bun ki shnong Khasi kiba ker ïa ki kiba sah ha khappud Assam.
“Ngin nym pdiang ba ïa ka khyndew jong ngi ki Khasi ban leit sha Assam hynrei lada kita ki Nepali kim kwah ban sah ha Meghalaya kin mih noh beit” u la ong.
U la ïathuh ba katkum ka jingïoh lum jingtip na ophis Deputy Commissioner ka West Khasi Hills ki Nepali kiba sah ha Umtap ki don 125 ngut, ha Umwali ki don 117 ngut, ha Umbyrsit 32 ngut bad ïa kine dang don shibun ki shnong Khasi kiba don markhap bad ka Assam.
U Bah Lumlang u la ïathuh ba ki shnong Khasi kiba don markhap bad ka jylla Assam ki long ka Umyïap Langpih, Mawdiangsnam, Umpha, Darithang bad kiwei.
U la ong ruh ba ïa ki Nepali lada ki sah ha Meghalaya kum ki sengbhalang kin ym pdiang ba kin sah namar kim lah ban ïada ïa ki namar ki tieng ïoh lashai ynda ki la syaid kin sa puh kylla.
