Shillong, Nailur 06
U Working President ka Khun Hynñiewtrep National Awakening Movement (KHNAM), Bah Thomas Passah ha ka Sngi Thohdieng u la ong ba ka Sorkar ka dei ban kynthup lang ïa baroh haba phai sha ka kylla ba-ar jong ka jingïapynbeit pud bad ka Jylla Assam.
“Mynta haba ki ong ban ïakren, lada ym kynthup lang ïa baroh (stakeholders), kata kane ka kam kan sa pulom,” ong u Bah Passah da kaba bynrap ba dei ban kynthup lang ïa baroh ki ‘stakeholder’ kum ki Daloi, Waheh Shnong, Rangbah Shnong, nongmihkhmat ka thaiñ, sengbhalang nalor kiwei-kiwei.
Ha kajuh ka por, u la ong ba ka dei ban don ka jingpruid dak ïa u pud u sam ha madan kumjuh ka jingleit jngoh ïa kito ki jaka kiba don hapdeng ka jingkajia khnang ban sngewthuh kham bha ïa ka jinglong-jingman.
Haba kdew ba u Myntri Rangbah ka Jylla um shym la wanrah ïa ka soskular ka jingïateh jong ka kylla banyngkong ka jingïapynbeit pud hapoh ïingdorbar ha shuwa ban ïasoi hakhmat u Myntri ka tnad kam pohïing ka Sorkar Pdeng, u Amit Shah, u Bah Passah u la ong, “Ha kane ka kylla ba-ar, ngi kwah ba ka Sorkar ynda ka la pyndep lut ïa baroh ki jingdonkam haba ïadei bad kane ka bynta, ka dei ban wanrah hapoh ïingdorbar lyngba ka Dorbar Kyrpang ban ïatai, ha shuwa ban leit sha Delhi.”
Kum ban shu kdew hangne, u Myntri Rangbah ka Jylla, u Conrad K. Sangma u la ong ba ka jingpynbeit pud hapdeng ka Meghalaya bad Assam ka shu kham jyrwit -jyrwat ha ka kylla ba-ar namar ka jinglong jong ki jaka bad ka jingïakren ban lah ban pynbeit ka dang bteng ha kaba ka jingïakynduh hapdeng ki ar Myntri Rangbah ka lah ban don biang ha u Risaw.
Ïa kane la pynpaw da u Myntri Rangbah haba ki nongthoh khubor ki buh jingkylli halor ka jingbym lah ban ïaid shaphrang ka jingïakren pynbeit pud ha ka wat ba-ar ha ki 6 tylli ki jaka kiba dang dei ban pynbeit pud.
U Sangma u la ong ba ka Sorkar ka don ka jingthrang ban pynbeit pud kumba la leh ha ka kylla banyngkong, hynrei ha ki 6 tylli ki jaka kiba dang dei ban pyndep ha kane ka kylla ba-ar ban pynbeit pud ka shu kham jyrwit-jyrwat namar ka jinglong ki jaka khamtam kum ka Langpih, Psiar-Khanduli, Block-I bad Block-II.
Haba kylli lano ka jingïakynduh hapdeng ki ar Myntri Rangbah kan long biang, u la ong ba la antad ba la kumno-kumno ka jingïakynduh ki ar Myntri Rangbah ka Meghalaya bad Assam ka lah ban long ha u Risaw mynta u snem.
U la ong ba dang shen ha kawei na ki jingïakynduh, u la ïakren bad u Myntri Rangbah ka Assam, u Himanta Biswa Sarma ha kaba la ïoh ban pynkynmaw markylliang halor ka jingdonkam ban ïakynduh biang na ka bynta ban ïakren ïa ka mat pynbeit pud.
Kum ban pynkynmaw, ki 6 tylli ki jaka kiba la dep pynbeit ha ka kylla banyngkong ki kynthup ïa ka Tarabari, Gizang, Fahala, Baklapara, Khanapara (Pilingkata) bad Rattachera.
Kine ki jaka kiba la dep pynbeit ha ka kylla banyngkong ki hap ha khappud jong ka Kamrup distrik bad Cachar distrik ka Assam bad ha West Khasi Hills, Ri-Bhoi bad East Jaiñtia Hills distrik jong ka Meghalaya.
