Shillong, Nailur 06
Hadien ka jingkynnoh u MLA ka Nongkrem u Bah Ardent Basaiawmoit ba ki pulit ki bat ïa ka kali jong u hynrei ki khlem bat ïa kiwei pat ki kali tah ïit ïong, u Superintendent of Police ka East Khasi Hills district, u Bah Sylvester Nongtnger u la pynshai ba ki pulit pynïaid kali ha Mawlai ki khlem bat ne pynsangeh kyrpang tang ïa ka kali jong u MLA, hynrei ka jingbat ïa ki kali ka dei ïa baroh, bad haba ki pulit pynïaid kali ki la ïohi ïa u MLA ki khlem bat satia.
Haba kren sha ki lad pathai khubor ha ka Sngi Thohdieng, u SP u la ong ba ki pulit pynïaid kali ki pyndep ïa ka kamram jong ki ban peit ïa ki kali kiba tah ïit ïong ha Mawlai ha 22 tarik Nailar, 2024 bad ka jingweng ïa kaba tah ïit ïong ha ki kali ka dei katkum ka jingbthah na ka Supreme Court.
U Bah Nongtnger u la ïathuh haba ki pulit ki bat ïa ki kali ban peit ïa kiba tah ïong, la bthah ruh ba ym dei ban bat ïa ka kali ba shong ki MLA bad Myntri Sorkar kaba la ïoh ruh ka jingbthah ktien ba ïa ka kali ba shong ki Myntri Sorkar namarba ki Myntri Sorkar bad ki MLA ki ïoh mar kawei ka kali ban tah ïit ïong.
Halor ka jingkynnoh ba ki pulit ki leh shiliang, u SP u la pynshai ba ka jingkynnoh kam don nongrim namar ki pulit ki ju bat naphang ban peit ïa ki kali lane random checking, hynrei haba ïohi ïa kano-kano ka kali ba don u MLA, ki pulit ki pyllait noh namar ba la dep batai ktien da ki bor ba kham halor ba ki Myntri Sorkar bad ki MLA ki lah ban tah ïit ïong mar kawei ka kali kaba ki pyndonkam.
U SP u la ong ba ki Myntri Sorkar bad ki MLA ki ju phah ruh ïa ka kali jong ki kaba ki tah ïit ïong sha ka Committee kaba la thaw da ka Sorkar katkum ka hukum ka Supreme Court bad ka dei kane ka Committee kaba pdiang ïa ki jingthoh bad bishar mano ba lah ban tah ïong ha ki ïit jong ki kali.
Kumta u la ong ba ki pulit ki pyndep ïa ka kamram jong ki ban bat ïa ki kali bad tar noh ïa ka ïit ïong kaba shu tah khlem nongrim ha ki ïit jong ki kali.
Shuh shuh u SP u la batai ba ki don pat ki kali kiba lah ban tah ïit ïong hadien ba la ïoh jingbit na ka Committee kaba ki dkhot ki kynthup ïa u Principal Secretary Home (police), Principal Secretary (transport), Secretary (Law), bad Director General of Police (DGP).
