Shillong, Nailur 06
Ki pulit ka East Khasi Hills district ki la ïoh ban tar ïa ki plastik ïong kiba la tah ha ki ïit ïong kali haduh 1,788 tylli. Na kane ka jingtalasi ïa ki kali ba tah plastik ïong la daiñ kuna palat T. 13 lak tam kata haduh T.13,35,000 tang ha ki ar bnai tam.
Ki kali kiba la shah tar noh ki plastik ïong na ki ïit kali ki dei kiba wan poi ha East Khasi Hills district na kylleng ki jaka bad ki la shah bat ha ki pulit pynïaid kali kiba la pyndep ïa ka kamram jong ki katkum ka hukum ka Supreme Court kaba la mana ban tah plastik ïong ha ki ïit kali.
Na ki 1,788 tylli ki kali kiba ki pulit ki la tar ïa ki jingkah ïong ha ki ïit kali, 30 tylli ki dei ki kali Sorkar ML01, bad na ka jingtalasi ban lap ïa ki kali kiba kah ïong ïa ki ïit, la ïoh ban daiñ kuna haduh T.13,35,000 naduh 1 tarik Naitung haduh 6 tarik Nailur, 2024.
U SP ka East Khasi Hills district u Bah S Nongtnger, u la ong ba ka Supreme Court lyngba ka hukum jong ka halor ka mukotduma (Writ Petition (Civil) No. 265 of 2011) ka la mana ban kah ïong ïa ki ïit kali baroh sawdong.
Kumta, ha kaba ïadei bad kane, na ka liang ki pulit ka Shillong Traffic Police (STP) ki kwah ban kyrpad ïa baroh ki trai kali ban kiar na kaba kah ïong ïa ki ïit kali bad kito kiba la kum tah, ka bha ba ki weng noh lypa dalade shwa ban shah bat ha surok ha ki pulit.
U la ong ba ka jingtalasi ïa ki kali kan nang ïai bteng bad yn pynngat ki kyndon kiba khia bha ha kaba ïa kiba pynkheiñ aiñ kin shah daiñ kuna.
Ki Myntri Sorkar, MLA ki ïoh pyndonkam kawei kali kaba tah ïit ïong: Nongtnger
