Nongstoiñ, Nailar 19
Ka Miangmawdar LP School ka dei kawei na ki skul kaba shah ieh khunswet haduh mynta ha kaba la ong ba kane ka skul mynta kala jot rathai.
Ïa kane ka lap da ka Khasi Students’ Union (KSU) Lyngam Hynneng Brei Area Unit ha ka 18 tarik mynta u bnai hadien ba kala pynlong ïa ka jingjurip bad noh synniang ruh da ki tin sha ka skul, ha ka jingïalam u samla Banshan Sohbar General Secretary KSU Lyngam Hynneng Brei Area Unit ha jingïadonlang kiwei ki dkhot.
Na ka liang ka KSU ka la ïoh ban aiti ïa ki tin ha u Bah Filter Riangshiang uba dei u Secretary ka Managing Committee jong ka Miangmawdar LP School.
U Samla Banshan u la ïathuh hadien ba la ïoh pdiang ïa ka shithi na ka managing committee na ka bynta ban ïarap ïa ka skul, ka seng mar mar ka la leit jngoh hynrei kaba lyngngoh la lap ba ka ïing skul ka la long kaba la jot rathai.
Shuh shuh la ïathuh ruh ba ha ka por lyiur ka skul ka hap ban ai shuti noh ïa ki khynnah namar haba don ka jinghap slap, ka jaw lut shapoh bad buh jingeh ïa ki khynnah.
U samla Banshan u la ong ba ka long kaei kaei kaba pangnud ba ka Sorkar lyngba ka tnad Pule Puthi ka la shu ieh meinah ïa kane ka shlem ai jinghikai.
U la ong ruh ba ka seng ka kyntu ïa ki bor ba dei peit, kumjuh ïa u Block Development Officer, u MLA ka thaiñ ban phai khmat lem sha katei ka skul bad ban pynkloi ïa ka lad jingïarap bad na ka liang ka seng ruh kan ïai buddien ïa ka jingdonkam jong ka skul.
Na ka liang u Secretary ka managing committee jong ka skul u Bah Filter Riangshiang u la pynpaw ka jingsngewnguh ïa ka KSU Lyngam Hynneng Brei Area Unit namar ka jinglong la kloi jong ka ban synñiang da ki tin na bynta ka skul kaba la jot la pra, ïa kaba ym shym la don ba phaikhmat sha kane ka skul hynrei dei tang ka KSU kaba la long kaba kloi ban ïarap watla ka Sorkar kam shym la sngap ïa ka jingkyrpad jong ka shnong bad ka Managing Committee.
U la ïathuh ruh ba na ka liang ka managing committee kala ai jingthoh sha ka Shallang C&RD Block bad sha u MLA ka thaiñ na bynta ki jingïarap hynrei u la kyrpad ruh ïa ka seng ban ïarap ban buddien lem ïa kitei ki bynta.
