Shillong, Nailar 19
Ka Khasi Students’ Union ka la rai ban pynsangeh noh ïa ka jingïaid paidbah da ka kjat kaba la pynbeit ban long ha ka 21 tarik mynta u bnai naduh ka ophis ka KSU na Jaiaw hadien ba ka la mih ka jingjia ba sngewsih haba don ka jingïaid paidbah da ki thuk thuk mynta ka sngi.
Haba ïakren bad u President ka KSU Sengkmie u samla Raymond Kharjana ha ophis treikam ha Jaiaw u la pynbna ba ha jaka ban ïaid paidbah da ka kjat na ophis na Jaiaw sha Khyndailad kaban long ha ka 21 tarik mynta u bnai la pynsangeh noh hynrei yn pynlong da ka jingïakhih da kaba shong kyllaiñ myngngor tang ki dkhot ka CEC ha Khyndailad ha ka por janmiet khnang ban lait na ki briew kiba shim kabu.
U la ong ba kane ka jingïaid paidbah ka dei ka jingïaid kaba jaijai ha ryngkat ka rah lama ïong kaba la ïaid ruh ha kylleng ka nongbah Shillong ban pynsngew ïa ka Sorkar ïa ki mat jingdawa hadien ba ka seng ka la ai por 15 sngi ban jubab da kaba ong ruh ba kaei kaba la jia hynne ka sngi, ka dei na ka daw ki riew shim kabu kiba pynkit ïa ka nam ha ka kyrteng ka seng.
Shuh shuh u samla Raymond u la ong ba ha kine ki sngi haba ka seng ka leit ban pynshai paidbah ha man ki district ka long beit kaba jaijai hynrei kam don kano-kano ka jingpynthut, hynrei u pynpaw ka jingsngewsih ban ïohi ha ki rynsan pathai khubor ba ki la don ki riew shim kabu kiba la pynthohbria ïa ka jingïaid rally ka seng.
U la pynkynmaw ba ha ka jingïakhih ha u snem 2013 ki la don kiba pynthohbria ïa ka seng namar haba ki pulit ki la ïoh kem ïa ki briew kiba rah petrol bom ynda la tohkit la lap ba ki dei na kiwei ki jaidbynriew.
Na ka liang ka seng ruh ka kloi ban ïatreilang bad ki pulit ban pynithuh ïa kito ki briew kiba donkti ban pynthohbria namar ka seng kam kwah ba kine ki san tylli ki mat ba ki la dawa kin pulom noh.
Na ka liang u General Secretary ka KSU u samla Reuben Najiar u la ong ba ki dkhot kiba la poi ha kane ka jingïaid paidbah da ki thuk thuk kim duna ïa ka lai spah ngut bad la bthah ba kin ïaid beit ïa ka lynti.
U la kyrpad ïa ki paidbah ba kim dei ban kynnoh ne kynthoh ïa ka seng haba don kum kine ki jingpynthohbria hynrei ki dei ban kyrshan ruh ïa kine ki mat jingïakhih kaba ka seng ka buh hakhmat ka Sorkar kaba dei ka jingmyntoi jong ka jaidbynriew.
