Shillong, Nailar 19
Ki Khun Ki Hajar jong ka Hima Langrin ha ka sngi Balang sa shisien pat ki la leit tur sha Khasi Hills Autonomous District Council (KHADC) ban ïakhih haba ïadei ki jingdawa ba bun ba ki khun ki hajar ka Hima kim pdiang shuh ïa u Pa’iem Nangtei Syiemïong ba un long u nongpeit nongsynshar jong ka Hima bad dawa ban pynlong da ka ilekshon kumjuh kiwei de ki jingdawa.
Ban shu pynkynmaw ha ka 22 tarik u bnai ba la dep ki Khun ki Hajar ka Hima Langrin ki la pynlong jingïakhih ha KHADC, hynrei haba la khot ïakren ban bishar ïa ki mat jingïakhih, ka Council ka la bthah ba kin ïa pynbeit ïa kane ka kam hapoh jong ka Hima.
Ha ka 7 tarik u Nailar u Pa’iem Nangtei u la lum ïa ka dorbar paidbah halor ka phang ban pynshai paidbah haba ka jingdon ka Management Board bad kiwei ki mat ha kaba ka la mih noh ka huri hura ha katei ka jingïalang kaba la khot pynlong ha Phlangdiloiñ.
Haba ïakren ïa u Bah Wadlad Lyngdoh Langrin uba long kum u Convener jong ki Khun ki Hajar jong ka Hima Langrin, u la ïathuh ba ka jingwan ïakhih biang jong ki ha KHADC ka long hadien ka jingïalang ba la khot da u Syiem jong ka Hima ba la pynbna ba kan sdang ha ka por 11: 30 mynstep jong ka 7 tarik Nailar, hynrei la kynnoh ba ïa katei ka Dorbar la sdang noh ha shuwa ka por, kaba la pynlong ba bun ki paidbah jong ka Hima kiba kwah ban ïashimbynta kumjuh ban pynsngew, ki la duh noh ban pynsngew namar haba ki paidbah ki poi ha ka jaka ka Dorbar ka la ïaid mar shiteng.
U la kynnoh, “Kane ka dei ka jingleh bymhok ka jong u ba khlem ki mat ïakren lane ki kam la shu sdang noh ïa ka Dorbar, ki paidbah kim ïoh shuh ban sngap, dei lyngba ki daw kiba mih mynha ka 7 tarik kaba pynlong biang ïa ngi ban wah ïakhih biang ha KHADC” la ong u Bah Wadlad.
Shuh-shuh u la kynnoh ba ka jingpynïaid ïa katei ka Dorbar Hima ruh ka long kaba khlem bud satia ïa ki kyndon jong ka Hima, ba ïa katei ka Dorbar la pynïaid da u ‘riew shimet kaba long pyrshah ïa ka Act jong ka Hima, da kaba kdew ba tang u Syiem, u Symbud Syiem, ki Myntri bad ki Lyngdoh Hima kiba lah ban pynïaid ïa ka Dorbar Hima Langrin.
Haba kylli ïa ka jingïakren ki nongïalam ki Khun ki Hajar ka Hima bad ka EC ha kane ka sngi, u la ïathuh ba na ka liang jong ka EC ka la kular ban shimkhia ban bishar pyndep kham kloi ïa kane ka kam bad ba kan sa pyntip ïa ki sienjam ba kan sa shim ha kine ki sngi ban wan.
U la ban jur ïa ka KHADC ba kan leh eiei ïa u Pa’iem Nangtei bad maham ba lada kam leh eiei, ki Khun ki Hajar jong ka Hima kin wan biang ban tur ha KHADC bad ba kan sa shim ruh da ki sienjam kiba kham tyngeh.
