Shillong, Nailar 19
Ka Kynhun Myntri ka Jylla ha ka Sngi Balang ka la mynjur ïa 6 tylli ki ‘Bill’ kiba ïadei bad ka tnad pule-puthi, kiba kynthup ïa 3 tylli ki jingwanrah jingkylla, ar tylli ki jingtyrwa na ka bynta ki skulbah shimet kiba thymmai, bad kawei ka jingpyndam noh ne ‘Repeal’.
Haba kren sha ki nongthoh khubor hadien ba la wai ka jingïalang ka Kynhun Myntri ba la pynïaid da u Myntri Rangbah ka Jylla, u Conrad K. Sangma, u nongaiktien ka Sorkar MDA, uba dei ruh u Myntri Sorkar, u Bah Wailadmiki Shylla u la ong ba baroh ki mat ba la wanrah hakhmat ka Kynhun Myntri ki dei ha ka liang ka pule-puthi.
“Mynta ka sngi ngi don hynriew tylli ki ‘agenda’ ban ïakren, bad baroh hynriew tylli ki mat ki dei halor ka tnad pule-puthi. Kiba bun na kine, ki dei ki ‘Bill’ – lai tylli ki dei ki jingwan jingkylla, ar tylli ki dei ki ‘Bill’ thymmai ban buh hakhmat ka Ïingdorbar bad kawei ka dei ka jingpyndam noh,” la ong u Bah Wailad.
U la ong ruh ba ka Kynhun Myntri ka la mynjur ïa ka Maharashtra Institute of Technology, Meghalaya (Amendment) Bill, 2026 ban pynïahap bad ki kyndon jong ka UGC.
Katkum ka jingong jong u, ka aiñ tynrai (Original Act) ka ailad ïa ka kynhun ba kyrshan ban rai ïa u ‘Visitor’, hynrei ka jingpynkylla ka bthah ba u Lat un long u ‘Visitor’, kumba long lem ha kiwei pat ki skulbah ha ka Jylla.
Kane ka ‘Bill’ ka tyrwa ruh ban pynkiew ïa ka jingmihkhmat jong ka Sorkar ha ka ‘Board of Management’ na uwei sha ar ngut ki dkhot bad ha ka ‘Board of Governors’ na ka ar sha lai ngut ki dkhot.
Ïa kaba kum kane ka jingpynkylla la mynjur na ka bynta ka Mahatma Gandhi University (Amendment) Bill, 2026.
U Bah Wailad u la ong ba kine baroh ar tylli ki shlem pule hashuwa ki bud ïa ka kyndon ha kaba ïa u ‘Visitor’ la rai da ka kynhun ba kyrshan, bad kane ka jingpynkylla ka pynbeit ïa kane katba ka pynbun ruh ïa ki nongmihkhmat Sorkar ha ki ‘Governing Body’.
Ka Kynhun Myntri ka la mynjur ruh ïa ka Martin Luther Christian University (Amendment) Bill, 2026.
U Bah Wailad u la ong ba katei ka jingpynkylla ka pyrkhing ïa ka jingtreikam jong ka skulbah tang hapoh ka Jylla Meghalaya, ka weng noh ïa ka kyndon na ka bynta ka ‘Distance Learning’ ka bym shah ïa ki skulbah shimet, bad weng ruh ïa ka bor ban pynïasoh ïa ki kolej; ka bym shah katkum ki kyndon jong ka UGC.
Ha kajuh ka por, ka Kynhun Myntri ka la ai jingmynjur ruh ïa ki ‘Bill’ haba ïadei bad 2 tylli ki skulbah bathymmai.
Ka Sister Nivedita University, Meghalaya Bill, 2026 ka tyrwa ban thaw ïa ka skulbah ha Byrnihat, katba ka Khasi Jaiñtia Presbyterian University, Meghalaya Bill, 2026 ka tyrwa ban buh ïa ka skulbah ha Sohïong.
Ka mat kaba khatduh eh kaba la mynjur ka dei ka ‘International Open University (Repeal) Bill’.
U Bah Wailad u la ong ba ïa katei ka aiñ la mynjur ha u snem 2011 hynrei ka dang sah khlem treikam haduh u snem 2022.
“Nangta, ha u snem 2022, ki don ki briew kiba la wan shakhmat ha ryngkat ka ‘Power of Attorney’, hynrei hadien ngi la tip ba ka don ka jingïatyngkhuh,” u la ong.
U la bynrap ba ka Kynhun Myntri ka la rai ban pynduh noh namarba katei ka kyrteng ka pynkheiñ ïa ki kyndon jong ka UGC.
“Lada phi ïohi ïa ka kyrteng, ka dei ‘International Open University’. Ka kyntien ‘International’ ka don hangtei, bad ka ‘Open University’ ruh ka don hangtei, kaba ym shah katkum ki kyndon jong ka UGC. Kumta ka Kynhun Myntri ka sngew ba, ka bha ban kiar na kano-kano ka jait jingeh ha ki por ban wan. Dei na kata ka daw ba ngi weng noh ïa kane ka aiñ.”
Mynta baroh 6 tylli ki ‘Bill’ yn sa wanrah ha ka Dorbar jong ka Ïingdorbar Thawaiñ ka ban sa wan jong ka Jylla.
