Shillong, Nailar 19
U khlieh nongïalam ka United Democratic Party (UDP), Bah Metbah Lyngdoh ha ka Sngi Balang u la ong ba ka seng ka la shimkhia ïa ki mat ba la pynpaw da ki MLA jong ka bad pynskhem ba ïa baroh ki rai la shim hadien ba la ïamir jingmut bad ki nongshim bynta.
Ha kajuh ka por, u Bah Metbah u la kyntait ba u don kano-kano ka jingtip haba ïadei bad ki khubor ba ki don ki nongmihkhmat ka seng kiba thmu ban leit pynïasoh noh sha ka BJP.
Hadien ka jingïalang jong ka Central Executive Council (CEC), u Bah Metbah u la kubur ba ki don ki jingïapher jingmut hapoh ka UDP hynrei u la ong ba ka seng ka dang ïakren (hapoh jong ka) halor kine ki kam.
“Peit, ha kano-kano ka longïing, ha kano-kano ka seng, ki don beit ki jingïapher jingmut, ki jingïapher ha ki jingsngew, ki jingïapher ha ka jingai jingmut. Bad ngi ju pyntikna barabor ba ngin sngap ïa kita baroh bad ban pynbeit pat ïa ki jingeh ha ka rukom kaba dei,” u la ong.
U la ban jur ba ka seng ka don ïa ki rukom treikam ban pynbeit ïa ki jingeh.
“To shu jer kyrteng ïa nga lada don kano-kano ka seng saiñ pyrthei ka bym don kano-kano ka jingïapher jingmut ne jingpher ha ki jingsngew. Kata kan don beit. Kumta lada jia ba don kum kane ka jait jingjia kaba mih, ngi ju ai beit ïa ka rynsan ha kaba ngi lah ban ïakren, ïasam bad pynbeit ïa ka. Ngi don ki rynsan bapher-bapher ha kaba ngi ïakren – ki jingïalang jong ka seng, ka CEC bad ki rynsan bapher-bapher,” la ong u Bah Metbah.
“Kaba ar, nga kwah ban kdew hangne da kaba shai ba lada jia ba don kano-kano ka rai kaba hap ban shim, ngi pyntikna ba ïa kita baroh la khmih bniah lyngba ka jingïamir jingmut bad uwei-pa-uwei u nongshim bynta jong ka seng,” u la bynrap.
Halor ki jingkynnoh ba ki don katto-katne ngut ki MLA ka UDP kiba dang pyrkhat ban pynïasoh BJP, u Bah Metbah u la ong ba um don jingtip eiei halor kata.
“Ngam don jingtip eiei shaphang kata. Nga kwah ban kylli na phi, mano kita, kiei ki kyrteng jong ki? Nangta ngan sa pynshai. Ngam don jingtip eiei shaphang kata,” u la ong.
Nalor kane, la kylli ruh ïa u President ka UDP halor ka jingleit jngoh ba dang shen jong ki MLA (ka seng) sha Delhi.
Haba ïadei bad ka kyrwoh na u nongïalam ba rangbah ka seng, u Bah Lahkmen Rymbui, u la ong ba kane ka jingleit ka long khamtam eh ban ïakren ïa ki kam halor ka FCRA bad u Myntri Kam Pohïing ka Sorkar Pdeng.
“Phi la dei ban ïohi ïa ka kyrwoh khubor ba la ïasam da u Bah Lahkmen Rymbui ha ka rukom kaba bniah. Nga tharai ba kata ka biang na ka bynta ki jingkylli. Kumta, nyngkong eh, kaba kongsan tam ka dei ka FCRA. Bad namarba ki la ïakynduh ïa u Myntri Kam Pohïing ha Delhi, u la shim kabu, ryngkat bad ka kynhun, ban pynsngew ïa kiwei pat ki jingsngewkhia kiba ïadei bad ka Jylla,” ong u Bah Metbah.
“Ki la leit bad ïakren markhmat. Kata ka dei kaba kongsan tam. Kumta ngi la pynbeit ïa kito ki jingeh kiba ka Jylla baroh kawei ka ïakynduh, katto-katne ki bynta jong ka imlang-sahlang,” u la bynrap.
U Bah Metbah u la ong ba ka jingïalang CEC ka la pynleit jingmut ruh halor kumno ban pynkhlaiñ ïa ka seng da kaba buh jingmut ïa ki jingeh saiñ pyrthei ki ban sa wan.
“Ki mat kiba kham kongsan ki long halor ka nongrim kumno ban pynkhlaiñ shuh-shuh ïa ka seng. Kata ka dei ka bynta kaba kongsan. Kumta haba ïadei bad ka buit treikam jong ka seng, ngi iehnoh ïa ka hapoh ka seng. Ngin ïaid katkum ka jingtreikam jong ka seng. Ngin pyntikna ba kata ka bynta kan poi haduh ka kyrdan kaba sha trai,” u la ong.
