Mawkyrwat, Nailur 06
Kawei ka kali ‘Alto’ ba dang thymmai – ka bym pat don nombor ka la thung baji sha riat hajan ka shnong Mawphuli kaba hap hapoh Ranikor Civil Sub-Division, South West Khasi Hills District, ka surok na Mawkyrwat sha Ranikor.
Ha kane ka jingjia, 2 ngut ki briew ki la mynsaw ba kynthup ïa u nongñiah.
Kine 2 ngut ba la mynsaw la tip kyrteng kum Casborlin Khardewsaw (38 snem) uba dei u nongñiah jong katei ka kali bad u Teibor Kharbani (24 snem) kiba dei na ka shnong Rambrai Nongkdait, West Khasi Hills.
Katkum ka tyllong khubor na ki pulit, la ïathuh ba katei ka jingjia ka la jia ha ka por kumba 11:00 baje mynstep jong ka 6 tarik u Nailur 2024 bad ïa ka daw jong ka jingkylla katei ka kali ym pat lah ban tip.
Ïa kitei 2 ngut kiba la mynsaw la rah noh sha Ranikor CHC bad hadien pat la pynkit noh sha Civil Hospital, Shillong na ka bynta ban ïoh ïa ka jingsumar ba kham bha.
Ha kaba ïadei bad katei ka jingkylla katei ka kali, ki pulit ka Ranikor Police Station ki dang pynlong ïa ka jingtohkit.
