Nongpoh, Nailur 08
Ha kawei ka jingjia kaba la jia ha ka Sngi U Blei ha ka por kumba 1:30 baje eiei mynsngi, uwei u rangbah na ka shnong Pyndensohsaw, Mawsynram ha East Khasi Hills District u la duh noh ïa la ka jong ka jingim hadien ba ka kali Hyundai Eon kaba u la ñiah bad pynher sted bha ka la ngat ha ka jingjia aksiden ha ka surok Shillong By-pass.
Katkum ka tyllong khubor ba la ïohlum na ki pulit, la ïathuh ba katei ka kali Hyundai Eon kaba don ïa u nombor ML05-J-8818, kaba dang hiar na nongbah Shillong ban leit sha ki bynta jong ka Bhoirymbong, hynrei tang mar ïa poi ha Umeit, u nongñiah uba la tip kyrteng kum u Micheal Jones Nohriang, um shym la lah shuh ban teh lakam ïa ka kali bad leit ban thom sha shiliang jong ka surok kat haduh ba kan da sied palat kumba 73 phut eiei na surok bad kylla khongpong ha pyntha rep jhur.
La ïoh jingtip ruh ba hadien ba katei ka kali, ka la kylla khongpong, ka kjat jong utei u nongñiah ka la sahkut hapoh katei ka kali. Na ka jingmynsaw jur ha katei ka jingjia, utei u nongñiah, u la khlad noh ha katei ka jaka.
Halor kane, ki pulit ka Khapmara PIC ryngkat bad ki riew paidbah ki la ïarap ban sei ïa ka met jong utei u rangbah, kaba la sahkut hapoh katei ka kali bad ban pynkit pat sha Nongpoh Civil Hospital na ka bynta ban pyndep ïa ka post mortem katba ïa katei ka kali kaba la julor, la rah noh sha Khapmara PIC na ka bynta ban pynlong ïa ka jingtohkit.
