Shillong, Nailur 08
Ka mukotduma kaba la mudui da ka kynhun Yatra ka dang bteng ha Ïingbishar na ka bynta ban bishar wat la ha ka sien bishar ba la dep ki la don kiba kam ba ka Dorbar Shnong Mawsynram ka la jop ha kaba ïadei bad ka krem Mawjymbuiñ.
La ong ba ka Ïingbishar Meghalaya High Court ka la pynlong biang ïa ka jingbishar ha ka 6 tarik mynta u Nailar hynrei ka kam ka dang sahteng namar ka don ka bynta ban dang hap phah ïa ka byrta (notice) sha ki katto-katne ki mamla kiba donbynta ha kane ka mutkoduma.
Ka Ïingbishar, lyngba u Acting Chief Justice HS Thangkhiew, ka la ai por lai taïew ïa ki mamla kiba don bynta ha ka mukotduma ba kin phah ïa ka kot jingpynshisha sha ka Ïingbishar.
La buh biang ban shim bishar ïa kane ka kam ha ka 30 tarik Nailur, 2024.
Kum ban pynkynmaw, ha ka 14 tarik Nailar, 2024 ka Ïingbishar Meghalaya High Court ka la bthah ban thaw da ka Committee na ka bynta ban khmih lut ïa baroh ki bynta kiba ïadei bad ka krem Mawjymbuiñ ha Mawsynram, kata ka long, kumno la pynïaid ïa kane ka krem da kaba buh jingmut ruh ïa ka jinglong kyntang jong ka jaka, ka jingshimkhia ha kaba ïadei bad ka mariang bad ka bynta kaba ïadei bad ka niam.
“Namar ba kane ka kam ka donkam ban kham shimkhia bha shwa ban ai ïa ka rai kaba khatduh, ka Ïingbishar ka sngew donkam ba hap thaw ïa ka Committee ban khmih bniah ïa baroh ki bynta kiba ïadei bad katei ka kam kumno la pynïaid ïa ka krem …….,” la ong ka Ïingbishar ha ka rai kaba la pynmih.
