Shillong, Nailur 08
Uwei u samla uba dang 23 snem ka rta, u la khlad noh na ka jingjur jong ka jingmynsaw hadien ba u la shah pynsaja (tortured) bad shah siat ha ki katto-katne ki briew ha kawei ka khlaw hajan ka shnong Mukroh.
Katkum ka khubor na ki pulit la ïathuh ba kawei ka longkmie na ka shnong Barato ha West Jaiñtia Hills ka la ujor da ka ejahar bad ha kaba la pyntip ba ha ka 1 tarik Nailur, 2024 ha ka por kumba 9:25 mynmiet, uwei u briew ba la tip kyrteng kum u Karmel Lamin (65 snem ka rta) ha ryngkat bad u khun jong u bad kiwei ki briew, ki la tan ïa u khun jong ka ba dang 23 snem shapoh kawei ka jaka khlaw, katba u dang wan da kali ha ka shnong Mukroh.
Shuh shuh la kynnoh ba kine ki briew kiba la leh ïa kane ka kam, hadien ba ki la tan shapoh ka khlaw, ki la pynsaja bad hadien kata ki sa siat ïa u da ka pistol. La ong ba une u samla u la khlad noh namar ka jingjur jong ka jingmynsaw na ka jingshah pynsaja bad shah siat.
Ha kaba ïadei bad kane, la ong ba na ka liang jong ki pulit mynta ki dang pynlong ka jingtohkit ban lap ïa ka jingshisha baroh bad kumjuh ruh ïa kitei ki briew kiba la kynnoh donkti ha kane ka kam.
