Tura, Nailur 08
Namar ka jingjyllei ka jingwan rung kyrthep kiba nabar sha Ri-Lum Garo, ka BJP ha Tura ka la kyntu ïa ka Sorkar hapoh ka jingïalam ka NPP ban khmih biang ïa ka kyrteng ki nongthep ‘vote’ katkum u snem 1952 kum u snem ot kyrteng (cut off year) na bynta ka GHADC bad 1972 haba phai sha ka ïingdorbar thawaiñ ka Jylla.
“Shisien la sdang ïa kane da u W.A. Sangma (Bam Kwai ha Dwar U Blei) ha kaba ïa ki kyrteng jong ki Hindu kiba dei shisha na Tura, Dalu bad Rongram la pyndam noh. Ïa kane kajuh ka rukom yn sa rah sha ka Sorkar hapoh ka
jingïalam ka NPP bad ka Executive Committee ha GHADC,” ong u MDC ka Tura, u Bernard Marak.
U Marak u la kynnoh ba ïa ki kyndon ka Khyrnit ba 6 la ïapeiñ naba ka GHADC hapoh ka jingïalam ka NPP ka la pulom ban peitngor ïa ka jingwan rung kyrthep kiba nabar, kaba katkum ka jingsngewthuh jong u, ka long kaba hap pyrkhat bha katba nang ïaid sha ki jaka thor ka Ri-lum Garo.
U la dawa ruh ban buh ïa ka shnat treikam kaba biang ha shuwa ban poi ka jingkieng Dhubri-Pulbari, kaba dang don hapdeng ka jingshna, ynda la plie ïa ka.
Katkum ka jingong jong u, ka Sorkar kam pynpaw ïa ka jingdon jong ki bar-jylla ha ki jaka thor naba ka jingshisha ka buh jingma ban hap ban pyrkhat ïa kane.
“Ha Ri-lum Garo, ïa ki pata la ai da ki Mondol bad Kananggo kiba dei ki bar-jylla bad ka GHADC ka soi ïa ki ha ka dor kaba rit ha kaba wat ha Tura, ki trai-ri kim ïoh ïa ki ‘Patta’. Kine kiba ïadei bad ka jaka bad ki skhim la ai sha kine ki ‘riew shimet khlem da pynshisha naba kine ki nongwan rung be-aiñ ki kylla long ka ‘vote bank’ jong ka Sorkar ba synshar,” u la kynnoh.
“Ki nongkhaïi trai-ri bad ki nongshong shnong bar-jylla kiba dei ki trai Jylla ruh ki shah ktah bad haba phai sha ki trai-ri, ki la iehnoh ïa ki jaka nongtymmen namar ka jingtieng lem bad kiwei-kiwei. Kumta la ïapeiñ ïa ka Khyrnit ba 6 bad man la ki jingpyrshang ban ïada ïa ka bha ka miat jong ki ‘riewlum lyngba ki kyndon (Hill Provision) la shah tap noh da ki kyndon ‘Non Hill Provision’ kaba plie lynti na bynta kiba nabar,” u la bynrap.
Haba kdew ba lada ym khmih bniah ïa kine kiei-kiei baroh kan ïalam sha ka jingbun paid jong ki nong Bangladesh ha Ri-lum Garo, u Bernard u la ong ba ka seng jong u (BJP) kan sa kyntu ïa ka Sorkar ban pynshisha biang ïa ki kyrteng ki nongthep ‘vote’ da kaba khmih lang ïa ki snem ot kyrteng.
