Shillong, Nailur 08
Ka kam nonghikai ka dei kawei ka shlem ban saiñdur ïa ka lawei jong ki khynnah bad ïa ki samla haba don ha ki jaka pule. Kumta, ka Dr. Ailynti Nongbri kaba dei ka Associate Professor barim ka Shillong College kaba bat kum ka Head Department ka sobjek Khasi ka la ong ban hikai tang ban ïoh tulop yn ym lah ban tei ïa ka lawei jong ki khynnah pule.
Ka jingïoh ban ïakren kyrpang bad ka Dr. Ailynti Nongbri ka dei hadien shibnai ba ka la shongthait ban hikai ha Shillong College. Hynrei, na ka liang u nongthoh khubor u la ïoh ban ïakynduh mynha ka Sngi Saitjaiñ ha ka jingïalang pynkup burom ïa ki samla pule kiba la pyndep ïa ka graduate mynta u snem 2024.
Ka Dr. Ailynti ka la ïathuh ba ka la hikai ha Shillong College mynta la palat 25 snem hynrei mynta haba ka la shongthait na kolej kan bteng ban trei ha ka dictionary.
“Nga shim ïa ka kam nonghikai ba ka dei ka jingkhot namar lada khlem ka jingkhot ngim lah ban saiñdur ïa ka lawei jong ki khynnah skul,” ka la ong.
Ka la pynpaw ka jingsngewphylla namar ka la ïoh ïa ka kam sorkar hynrei ka sngewtynnad ban leit ha ka kam hikai namar haba ka trei ka ju duwai ba kam dei ban trei tang ban ïoh pisa hynrei ban trei naduh ka mynsiem.
“Haba ka don ka jingkhot ngam ju don ka jingsngewthait namar nga hap ban ïaishah, ngi hap ban pyndem ïalade haba don ba pyndom,” ka la pynpaw bad bynrap ba ka kam nonghikai ka long kum uto u briew uba thaw ïa u khiew khyndew uba la pynwandur la ka jong ka jong ka bynta namar ha ki khynnah ruh ki don la ka jong ka jinglong.
Haba ïakren pat sha ka jinghiar ka akor ha kane ka juk kaba mynta, ka Dr. Ailynti ka la ong kum ka kmie kaba don ki khun, kum ka nonghikai ka akor ka long kum ka bai seng namar ïa kane ka akor la sdang na la ïing.
Shisien ba phi don ka bai seng kaba biang phi lah ban kiew kham shajrong bad kumjuh ruh shisien u khynnah u don ïa ka akor ka kam ba u trei kan kiew shajrong.
Ka la ong ba don ki khun kim ju kren haba ïakynduh ïa ki paralok don ki khun kim ju ai jaka shong haba wan ki briew hynrei don ki kmie ki kpa ki aidaw ba u dei u jait briew bym ju kren hynrei lada ki kmie ki kpa ki la hikai ki khun ki dei ban tip ïa ka akor.
