Nongpoh, Nailur 08
Ki pulit ka thanat Umïam ha ka Sngi Saitjaiñ, ki la lap noh ïa ka met jong kawei ka longkmie kaba la tip kyrteng kum ka Diamond Chyne (67 snem) na ka shnong Nongmensong, East Khasi Hills District kaba la per ha sla um jong ka pung Umïam.
Katkum ka tyllong khubor na ki pulit, la ïathuh ba katei ka longkmie, ka la jah rngai na la ïing ha ka step jong ka Sngi Saitjaiñ ha ka por kumba 7 shiteng haduh 8 baje eiei. Ha ka jingtohkit ki bor pulit ym shym la lap satia ïa ki dak mynsaw na ka met jong katei ka longkmie bad la suba ba ka la khlad na ka jingngam jyllop.
Ïa ka met kaba sah jong katei ka longkmie, la pynkit noh sha Civil Hospital Nongpoh bad la buh ha ka jaka buh metïap na ka bynta ban pyndep ïa kiwei ki jingdonkam katkum ka aiñ bad ruh ban leh ïa ka eksamin post mortem.
Wat lada na ka liang ki bor pulit, ki la pynshai sha ki bahaïing halor ki jingmyntoi lyngba ka jingleh ïa ka post-mortem, hynrei na ka liang ki bahaïing, ki la kyntait da kaba pynpaw ba kim don jingsuba sniew eiei halor ka jingkhlad jong katei ka longkmie. Hadien ba ïa katei ka jingkwah jong ki bahaïing la pdiang da u majistor ka Ri Bhoi District, ïa ka met jong ka longkmie la aiti noh sha ki bahaïing ba kin pyndep ïa ka jinglehniam khatduh.
