Shillong, Nailur 08
Ka Vellore ka dei kawei na ki jaka ha Tamil Nadu kaba ki nong Meghalaya ki bun bha kiba leit ban wad ïa ki lad jingsumar, hynrei ka jaka sah ka dei kawei na ki jingeh kaba kiba bun ki ju mad jingeh man ka por.
Kiba bun ki briew na Meghalaya kiba leit sha Vellore ki mad jingeh bha, kawei ka dei namar ba ka Meghalaya House ha Vellore ka don kham sha kyndong ha kaba kiba leit sha ki jaka sumar ki hap ban shu wai kali man la ka sngi ban leit bad wan.
Katkum ka jingïathuh kiba ju leit na Meghalaya ban phah sumar ha CMC Vellore namar ki jingshitom bapher bapher, la ong ba wat lada leit phah sumar sha CMC Vellore, ka jingjngai na Meghalaya House ka la kham jngai bad ka jingeh hi ka dei namar ba ka Meghalaya House ka don kham sha kyndong.
La ong ba kiwei ki Jylla ki tei ïa ka ïing ha ka jaka ba kham long pdeng hynrei tang ka Meghalaya kaba tei ïa ka ïing ha ka jaka kaba kham sha kyndong.
Ki la ong ba ka jaka ba ka Meghalaya House ka don, ka dei ruh kaba kham duna ka jingkhuid khamtam ka surok kaba lam ban poi sha Meghalaya House.
Shuh shuh la ong ba ki nong Meghalaya ki mad jingeh bha lada ki kwah ban leit thied ïa ki jingdonkam namar hap lut bai kali la kumno-kumno T.200 tang ban leit thied ïa iwei i tiar. Ki la ïathuh ba naduh ba pynkha ïa ka jaka sumar ka CMC ha Ranipet ki bun ki jingsumar ki la rah noh sha Ranipet bad kane ka jaka ka la kham jngai na Meghalaya House.
Ka Ranipet ka dei kaba ju hap ha Vellore district baroh shikatta hynrei ka Sorkar Tamil Nadu ka la pynkha kum ka district ha ka 28 tarik Naiwieng 2019.
Ka CMC Vellore ruh ka la pynkha ïa ka jaka sumar ha Ranipet naduh u snem 2022.
Kumta kiba bun ki nong Meghalaya kiba ju leit phah sumar sha Vellore ki la ai jingmut ba ka Sorkar Meghalaya ka dei ban wad jaka noh ha Ranipet khnang ban kham pynsuk ïa ki paidbah namar ba kiba bun hi ki briew na Meghalaya kiba ju leit sha CMC ki dei beit kiba leit ban phah sumar ïa ki jingshitom bapher bapher.
