Shillong, Nailur 09
Ka kynhun ki nongñiah kali kamai ‘Tourist’ ka Jylla kiba don hapoh ka synjuk jong ka All Khasi Meghalaya Tourist Taxi Association (AKMTTA) ha ka 9 tarik u Nailur 2024, ka la sdang ïa ka taïew jingïakhih da kaba sieh lama ïong ha ki kali kamai ne ka ‘Black Flag week’ ka ban neh haduh ka 14 tarik u Nailur, 2024.
Kane ka jingïakhih ban sieh lama ïong ha ki kali ka dei ka rai kaba na ka liang ka AKMTTA ka la shim ha ka 6 tarik u Nailur 2024. Kane ka jingïakhih ka la sdang naduh ka por mynstep jong ka 9 tarik ha ki thaiñ Khyndai Lad bad sha kiwei-kiwei ki jaka kiba don markhap bad ka Sor Shillong bad kiwei-kiwei ki distrik ruh kumjuh. La ong ba ha kane ka taïew sieh lama ïong kan ym don satia kano-kano ka jingsangeh kamai kali ne khang ïa kino-kino ki kali kiba wan nabar ka Jylla hynrei kan ïaid beit kumba ju long manla ka sngi.
Haba ïoh ban ïakren bad u President ka AKMTTA, u Bah Ricaldinus Dohling u la ong ba ka jingshim jong ka seng ïa kane ka sienjam ha kane ka kynti kaba mynta ka dang dei tang ka jingsdang jong ka jingïakhih jong ki ban pyni sha ka Sorkar Jylla ïa ka jingsngap mynthi jong ka halor ki jingdawa jong ka kynhun ban pyrkhing noh ïa ki kali kamai ‘Tourist’ kiba wan nabar ka Jylla ban kamai sahuh shapoh kane ka Jylla khang ba ki kali kamai ‘Tourist’ kiba napoh ka Jylla kin ïoh ban kamai bha.
“Ngi lah dep wan buh ïa ka shithi ha ka 30 tarik hynrei ka Sorkar kam peiphang lane sngap ïa ki jingdawa jong ngi bad ki jingdawa jong ngi ruh ki long ban khanglad ïa ki kali kamai kiba wan nabar ka Jylla ban kamai ha ki jaka jngoh kai pyrthei kiba don hapoh ka Jylla hynrei ban ailad noh ïa ngi ki trai Ri bad trai muluk ban ïalam ïa ki briew kiba leit sha ki jaka jngohkai kiba don hapoh ka Jylla,” ong u Bah Dohling.
Shuh shuh u la ong ba ka Sorkar haduh mynta ka dang ïai sngap mynthi bad kam pat phah satia ïa kano-kano ka jingthoh ban ai ïa ka jubab kaba na ka liang ka kynhun ka la dawa. Kumta ka kynhun ka la dawa ba ha shwa ban kut ka 14 tarik, ka Sorkar ka dei ban khot ïakren ïa ki bad lada ka jia ba ka Sorkar kam sngap ïa ka jingdawa, na ka liang ka kynhun kan sa shong pyrkhat ban shim noh sa da kiwei ki sienjam.
“Kane ka dei ka dak ka jingïakhih kaba rit bad nangne shakhmat lada ka Sorkar kam pat sngap ïa ki jingdawa jong ngi, kin sa dang ïai don shuh sa kiwei ki sienjam kiba ngin sa shim”, ong u Bah Dohling.
