Shillong, Nailur 09
U Bah Prestone Tynsong uba dei u Symbud Myntri Rangbah ka Jylla u la poi shah sumar hapoh ka Intensive Care Unit (ICU) jong ka Nazareth Hospital, Laitumkhrah hadien ka jingkiew kynsan jong ka ‘Blood Pressure’ ne ka kiew snam.
Katkum ka kyrwoh khubor na ka Sorkar, la ong ba ïa u Bah Prestone uba khmih ruh ïa ka tnat Kam Pohïing (Home) la pynkit mar-mar sha Hospital ha ka por 5 baje janmiet sngi jong ka Lah Sngi U Blei, ha kaba ki doktor ki la buh ïa u hapoh ka jingkhmih kaba bniah bha.
Ka khubor kaba la ïoh lum ka la pyntip ba ka jinglong-jingman jong ka koit ka khiah u Bah Prestone ka dang biang hynrei u hap ban don hapdeng ka jingkhmih bniah jong ki doktor. Ki doktor kin ïai bteng ban khmih bniah ïa ka Blood Pressure jong u bad hadien ba ka la hiar yn sa pynkynriah noh pat ïa u sha ka Private ward.
