Shillong, Nailur 09
Ka long kaei-kaei kaba pynkyndeh mynsiem shikatdei eh ïa kiba ieid ïa ki sur jingrwai jong uwei u nongrwai bapawnam ka pyrthei, u Akon namar ha ka sien kaba nyngkong eh une u nongrwai un wan ban ïuhkjat hapoh ka Jylla ha ka tamasa Cherry Blossom ka ban sa long ha ka 16 tarik u Naiwieng, 2024.
Ha kane ka tamasa ka ban sa long ha ki ar-sngi lynter kata ha ka 15 bad 16 tarik u Naiwieng 2024, yn sa wan pynshongshit da ki nongrwai ba pawnam kum ka Boney M bad u R3HAB nalor kiwei-kiwei.
La pynlong da ka Rockski EMG ha ka jingïatreilang bad ka kompeni jong ka Akon, ka Konvict Touring, kane ka jingshad ka dei ka bynta jong ka “Superfan Tour” jong ka Akon, kaba kynthup ïa kawei ka jingpyni na ka bynta kawei ka ri ha Asia ha u bnai Nohprah bad Naiwieng, ryngkat bad ki jingsangeh ba la pyndap ha ki 8 tylli ki ri.
Ka tamasa Cherry Blossom ka don ka histori jong ki jingïalehkai kiba itynnad bha, namar ka la lah ban khring ïa ki nongpeitkai na ka thaiñ Shatei Lam Mihngi bad na kylleng ka ri ha ki snem ba la dep.
Ha u snem ba la dep, ha kane ka tamasa la wan ban ïashimbynta da u Ne-Yo bad u Ronan Keating, ha kaba ki la khring ïa ki paidbah kiba bun. Kane ka jingpynmih jong u snem 2024 ka long kaba kongsan bha namar ka kynthup ïa ka jingleit phai jong ka Boney M, kaba la don lang ïa ka dkhot nongseng ka Maizie Williams, kaba pynlong ïa ka kum ka jingïalang kaba ym dei ban pep na ka bynta ki nongkyrshan jong baroh arngut ki nongrwai.
Ka Season ticket na ka bynta ka tamasa Cherry Blossom lah ban ïoh mynta na BookMyShow.com, kaba sdang naduh T.3,299 na ka bynta ki General Admission pass bad T.8,999 na ka bynta ki VIP pass.
