Shillong, Nailur 09
U Titosstarwell Chyne uba dei u MDC ka Sohra bad ruh u Nongïalam ka Liang Pyrshah hapoh ka Khasi Hills Autonomous District Council (KHADC) u la pynrem jur ïa ka jingkynthoh jong u President ka VPP, u Bah Ardent M Basaïawmoit uba la ong ba ki MDC ki dei kiba la kut ka por treikam ne ïap (expired).
U Bah Titos u la ong ba ka kyntien ‘expired’ ba la pyndonkam da u Nongïalam ka VPP ka la long palat liam, bad kaba la pynmong shimet ïa u, namar ïa kane ka kyntien ha u briew la pyndonkam tang lada u briew u la ïap. U la ong ba ïa ki briew kiba kynthoh kum ïa kita ki jait kyntien ai u Blei un bishar.
Shuh shuh u Bah Titos u la ong ba ki MDC kim dei ki mar ki mata ne ki dawai ba la thoh tarik, bad da u briew ban pynbna paidbah ba ki MDC ki la ïap ka dei ka jingkren kaba la palat.
Ha kawei pat ka liang, ki MDC jong ka United Democratic Party (UDP) kiba don ha ka Liang Pyrshah ha Khasi Hills Autonomous District Council (KHADC) ki la pynpaw ba ki la kwah ba ka ilekshon kan long noh namar ba lada kin pyrshah biang ïa ka jingpynjlan ïa ka ilekshon MDC hadien ba ki la tip ïa ki daw kan long biej.
Haba kren shai ki lad pathai khubor, u Nongïalam ka Liang Pyrshah, u Bah Titosstarwell Chyne u la ong ba naduh kaba sdang, ka UDP ka la pyrshah ïa ka jingpynjlan ïa ka samoi treikam jong ki MDC, hynrei hadien ba la ïaid shakhmat ka jingpynbeit thymmai ïa ki konstitwensi jong ki MDC, kum ki nongmihkhmat ki hap ban ïashim bynta namar kim lah ban shu sngap jar lane ban shu pyrshah lut khlem da ai jingmut.
Haba kylli halor ka jingpynjlan biang sa 6 bnai ïa ka samoi treikam jong ki MDC, u Bah Titos u la ong ba u la leit ban wad jingtip halor kane khamtam hadien ba la mynjur ïa ka Amendment Bill, hynrei u la ïoh jingtip ba ka Sorkar ka hap ban pynkhreh ïa ka ilekshon ka ban shim por pat kumba 2 haduh 3 bnai.
U la ong ba kum ki nongmihkhmat bad MDC ki la kwah noh ban pynlong ïa ka ilekshon MDC, hynrei namar ba ki la tip ïa ki daw kam ïahap ban dang ïa pyrshah. U la ïathuh ruh ba u la tyrwa sha ka Sorkar ba kan pynlong noh ha u Naiwieng lane Nohprah mynta u snem, hynrei ha kine ki bnai ruh kan don ka jingeh namar ka dei ka por eksam ha ki skul bad bud sa ka aïom Khristmas.
