Shillong, Nailur 09
U nongïalam ka Liang Pyrshah u Dr Mukul Sangma u la ther tyngeh ïa ka tnat pulit bad ïa ka Sorkar Jylla halor ka jingphah pulit pahara ban synran wat ïa ki briew kiba khlem don satia kano-kano ka jingma ha ka jingim jong ki bad u la ong ba kane ka jingleh ka la pynsyrwa ïa ka pisa.
Haba ïakren bad ki nongthoh khubor ha Assembly Secretariat ha ka Lah Sngi U Blei, une u Myntri Rangbah barim ka Jylla u la ong ba ki don bun ki briew saiñ pyrthei kiba shah thungkam (political appointees) ha ka Sorkar bad kine ki ïoh ruh ryngkat ki pulit ban pahara bad synran ïa ki haba ki leit shano-shnao bad ki ïoh ban leh sahuh bad pyni khyllew.
“Nga dawa ba dei ban don ka jingïalang jong ka State Security Commission namar ym lah ban shu pyndonkam bakla. Hato kine ki briew ki la tyngkhuh pyrshah bad ki kynhun lehnoh haduh ba ka jingim jong ki ka la don jingma?” u la buh jingkylli.
U la buh jingkylli ruh kumno ki pulit ophisar ki nud ban ai jingbit ban phah synran pulit khlem nongrim ïano- ïano khlem ka daw kaba biang kaba pyni ba ka jingim jong ki ka don jingma shisha.
“Lada ka jingphah synran pulit ka dei kaba khlem donkam, ngin dawa ba lada lap ïa ki heh pulit kiba donbynta ban leh ïa kane ngin dawa ba kita ki pulit ophisar kin puroi ïa ka pisa kaba la pynlut na ka bynta kito kiba ïoh pulit pahara,” la byrthen u Dr Mukul.
Haba kylli halor ka jingthung kam ïa kiba don ha ka saiñ pyrthei (political appointees) kaba la jia ruh ha ka por jong u ba u ïalam ïa ka Sorkar kum u Myntri Rangbah, u Dr Mukul u la ong ba ma u um shym la ailad ban pyndonkam bakla bad um shym la buh bung ngut kita ki nongaibuit kumba leh kane ka Sorkar.
Kumta u la ong ba don da u pud ïano dei ban ai pulit pahara namar ba dei tang kiba hap ha ka thup ba don jingma ka jingim ki don hok ban ïoh jingïada ym ban phah pathar ïa ki pulit pahara kat ïa kiba pan.
