Shillong, Nailur 09
Ka Sorkar Jylla ka la ai por haduh ba kut jong u Nailur mynta u snem ïa ka Harijan Panchayat Committee (HPC) na ka bynta ban pynkynriah noh ïa ki 342 tylli longïing na Them Metor, Them Ïew Mawlong.
Ïa kane la pyntip da u Symbud Myntri Rangbah ka jylla u Bah Sniawbhalang Dhar uba khmih ruh ïa ka tnat Pynroi Sor bad ha kaba u la ban jur ba ka Sorkar Jylla ka la kut jingmut shisha ban pynbeit ïa ka jingpynkynriah ïa ki briew kiba sah ha Them Metor khlem da pynslem shuh.
“Ha ka jingïalang ba khatduh, ki la kyrpad bad pan por sa 15 sngi, ïa kaba ngi la mynjur. Hadien, ki la pan por biang tad haduh ka taïew ba kut jong u bnai Nailur. Ngi la dep ïakren ïa ka bad u Chief Secretary, bad ha kaba un sa shong jingïalang bad ki ha kaba kut jong kane ka taïew,” la ong u Bah Sniawbhalang haba kren sha ki lad pathai khubor haba pynshai ïa ka jingïakren kumba ka long mynta bad ka HPC.
Shuh shuh haba kylli, hato kane ka jingpan por ka HPC ka lah ban dei tang ka jingthmu ban pynslem ïa ka kam? U Bah Sniawbhalang u la kyntait ïa kane bad ong, “Kane kam dei ka buit pynslem” bad bynrap “Ki la pan por haduh ba kut jong u Nailur ban ïakren ïa kiwei kiwei ki kam. Ngi la ai ha ki ïa ka por. Ka jingïalang ban wan kan ym long shuh ha ka kyrdan jong nga ne u Symbud Myntri Rangbah Bah Prestone Tynsong, hynrei kan long noh ha ka kyrdan u Chief Secretary”.
