Shillong, Nailur 09
Namar ka jingleh kuman bad leh mynthi jong ka Sorkar Jylla ban pyntreikam ne wanrah ïa ki aiñ ban khanglad ïa ki kali kamai ‘Tourist’ kiba wan sha ka Jylla ban kamai sahuh, na ka liang ka Khun Hynñiewtrep National Awakening Movement (KHNAM) ha ka 9 tarik u Nailur 2024, ka la leit ban ïakynduh bad aiti da ka jingthoh ha u Executive Member (EM) ba dei khmih ïa ka tnat Trade ka Khasi Hills Autonomous District Council (KHADC), u Bah Gigur Myrthong ban tuklar lem halor kane ka bynta khnang ba kan wanrah jingmyntoi ïa ki paradoh parasnam kiba im ban kamai jakpoh lyngba ka kam kamai kali ban kit ïa ki nongwan jngohkai pyrthei sha kylleng ki jaka hapoh ka Jylla.
Haba kren sha ki lad pathai khubor hadien ka jingwan ïakynduh ïa u EM, u Working President ka KHNAM, u Bah Thomas Passah u la pynpaw ïa ka jingai jingkyrshan ïa ka Khasi Meghalaya Tourist Taxi Association (AKMTTA) kaba dawa ïa ka Sorkar Jylla ban thaw ïa ki rukom treikam ne ki ‘Policy’ bad ha kajuh ka por ban dawa na ka Sorkar ba kan pyrkhing ïa ka jingwan kamai sahuh ki kali ‘Tourist’ sha ki jaka jngohkai pyrthei kiba don hapoh ka Jylla.
U Bah Thomas u la ong ba ka jingïakhih ban khanglad ïa ki kali kamai ‘Tourist’ nabar ka Jylla ban kamai sahuh ha kane ka Jylla, ka dei ka mat kaba na ka liang ka seng ka la leh naduh u snem 2017 bad wat la na ka liang ka tnat Transport ka Sorkar Jylla ruh ka la aibor ban pynlong ïa ka jingtalasi ïa ki kali kiba wan nabar hynrei ka dei ha u snem 2018 ba ka la long lehnohei noh hadien ka jingwan jong ka Sorkar MDA-I ha ka bor kaba la pynjah klep noh ïa kane ka kam.
“Na ka liang u Commissioner ka tnat Transport u la bthah ïa baroh ki ophisar jong ki distrik kiba dei peit ïa ka Transport ban talasi ïa ki kali kiba wan nabar ha ki jaka jngohkai pyrthei bad ngi la khmih lynti ba kane ka kam kan urlong noh hynrei ha ka jingwan noh jong ka ilekshon, kane ka kam la shu sah bad jah noh kumto”, ong u Bah Thomas.
U la ong ba lada ki kali kamai kiba wan nabar ka Jylla ki leit shaduh ki jaka jngohkai pyrthei ban kamai, ka mut ki la pynkheiñ ïa ka aiñ jong ka Trading By Non-Tribal Regulation, 1954.
Shuh shuh u Bah Thomas u la kyntu ïa u EM ka tnat Trade ba u dei ban pynkhie im biang ïa ka dorkhas ba la ïohpdiang na ka ophis treikam jong u Commissioner of Transport ka Jylla Meghalaya ha u snem 2018.
“Ka District Council ka dei ban pyntikna ba ki kali kamai kiba wan nabar ka Jylla kim dei ban ïohlad ban leit kamai sha ki jaka jngohkai pyrthei kiba don ha ka Jylla jong ngi khnang ba ka nongrim jong ka Trading By Non-Tribals Regulation, 1954 kaba dei ban ïada ïa ka khaïi ka pateng jong u trai Ri-trai muluk kan neh”, bynrap u Bah Thomas.
U la ong ba wat la na ka liang ka seng ka la pyrshang ban ïakynduh ne phah da ki shithi na ka por sha ka por sha u Myntri Rangbah ka Jylla, u Conrad K Sangma hynrei na ka liang ka seng kam ïohlad satia ban ïakynduh ïa u wat tang shisien ruh da kaba kynnoh ruh ba ka dei ka Sorkar MDA kaba la pynduh pyndam ïa kane ka jingdawa ka seng.
Na ka liang u EM jong ka Trade u la ong ba un ïakren bad ïathir sani bha bad ki ophisar jong ka District Council ban peit ïa ki lad ki lynti kiba ka Council ka lah ban leh.
