Shillong, Naitung 31
Hadien ba ka jingïalang pynsngew paidbah (Public Hearing) ka la long kaba jop da kaba sngap tang ïa ka sur jong kiba kyrshan ïa ka projek tih Mawshun jong ka Shree Cement Ltd., hynrei khlem da ailad pat ïa kiba pyrshah ba kin ïoh ban pynsngew ïa ka jingsngew jong ki, ka la pynlong ïa ka Khasi Students’ Union CEC ban mih shakhmat ban pynsngew ïa ka sur jong ka.
Ha ka jingkren sha ki nongthoh khubor ha ka Sngi Thohdieng lyngba u samla Raymond Khar-jana President KSU u la ong, ba nangne shakhmat ka seng kan sa pynpaw noh ïa ki kam kumba ka Sorkar Jylla ka la pynpaw paidbah ïa ka rukom treikam jong ka lyngba ka bor District kaba kynthup ïa ki pulit, ka Meghalaya State Pollution Control Board (MSPCB) bad ka Jaiñtia Hills Autonomous District Council (JHADC) ba lamkhmat da ka National People’s Party (NPP).
Shuh-shuh u samla Kharjana u la ong kumba ka paw ka jingpynsngew paidbah (Public Hearing) kam dei shuh ka ban ai jaka ïa kiwei ba kin pynsngew, hynrei kumba ka paw ha kane ka sngi ka long beit thik tang ïa kiba kyrshan ïa ka jingthmu, u la pynpaw ba ka seng ka suba jur ba ka don kaei re kaei kaba la thmu lypa na sha lyndet ïa kaba la jia ha katei ka jingpynsngew paidbah.
Haba jubab ïa ki jingkylli, u samla Kharjana u la ong ba lada ka rukom treikam ka Sorkar ha ka synshar paidbah ka pyni ïa ka rukom treikam ka bym beit kaba kawang da ki tyndong lyer pynsat khmat (tear gas), bom lathi ïa kiba kwah ban pynsngew ïa ka sur jingpyrshah, ka KSU nangne shakhmat ruh kan sa pyni noh da ki kam haba don ki jingpynsngew paidbah.
Nalor kata, u la ong, ba ka Sorkar Jylla ka dei ban shim ïa ka jingkitkhlieh ïa kaba jia ha kane ka sngi bad ban shim ruh da ka sienjam kaba tyngeh ïa ki nongtrei ka Meghalaya State Pollution Control Board, ki bor District bad ïa ki pulit.
