Jowai, Naitung 31
Ka jingthmu jong ka Shree Cement Limited ban tih mawshun ha Lumsyrman hapoh Elaka Nongkhlieh ka la urlong noh mynta ka sngi ka 31 tarik Naitung, 2026 namar ka jingpynsngew ïa ka sur paidbah (public hearing) ka la long kaba jop wat hapdeng ka jingkhang lynti ïa kiba pyrshah ban wan pynsngew ïa ka jingpyrshah jong ki.
Katkum ka kyndon aiñ jong ka Ri India, kino-kino ki karkhana shna cement shuwa ban ïoh sdang ïa ka jingtrei ki dei ban jop shwa ha ka public hearing kaba la aiti ha ki State Pollution Control Board ban pynlong.
Ha ka public hearing, ki nongshong shnong ki dei ban pynpaw ïa ka jingkyrshan ne jingpyrshah halor ka nongrim ka jingktah ïa ka mariang, ki wah, ki khlaw namar ka Pollution Control Board ka dei ban khmih halor ka jingktah ïa ka mei mariang ym halor ka nongrim ka roi ka par ne jingïoh kam ïoh jam.
Ka Meghalaya State Pollution Control Board ka la pynlong ïa kata ka public hearing na bynta ban tih mawshun ha ka sien kaba ar namar ka sien kaba nyngkong ka pulom noh namar ka jingpyrshah ba jur jong ki liang ki bym kwah ïa katei ka karkhana namar ki sa duh ïa ki lyngkha ki pynthor jong ki.
Ïa katei public hearing ba la long ha Lum Syrman la pynïaid da u Additional Deputy Commissioner jong ka East Jaiñtia Hills District Bah Alertson Nongbri ha ka jingdon ryngkat u Bah Yoofranky H Laloo, Environment Engineer MSPCB.
Ha kane ka jingïalang, u Yoofranky H. Laloo u Environment Engineer ka MSPCB u la ong ba kane ka public hearing ka dei ka jingpyrshang kaba ar ban pynlong ïa ka ha katei ka jaka hadien ba la pynsangeh noh ïa ka jingbishar kaba la buh ban long ha ka 22 tarik u Jymmang, 2026 namar ka jingkulmar.
U Bah Laloo u la pynshai ba ka MSPCB kan nym shim ïa ka rai kaba khatduh katkum ka jingbishar, hynrei ba baroh ki jingbishar, kynthup ïa ki jingai jingmut kiba kyrshan bad pyrshah ïa katei ka projek, yn aiti sha ka tnad peit bniah ïa ka jingktah jong ka mariang jong ka Jylla kaba dei ka State Environment Impact Assessment Authority.
Na ka liang kiba kyrshan ïa katei jingtih mawshun naduh u Dolloi Na-o-Kyrmen Sukhlein, Secretary jong ka Elaka Nongkhlieh Fencing Bareh bad 3 ngut ki nongshong shnong ka Elaka ki la pynpaw ba ka karkhana Shree Cement kan wanrah ïa ka roi ka par, ka kam ka jam bad kyntiew ïa ka ïoh ka kot jong ka thaiñ. Hynrei ym shym la don mano-mano na ka liang jong kiba kyrshan kiba pynksan ba ka jingtih mawshun kan nym don kano ka jingktah ïaka mariang bad kumta ter ter.
Katei ka public hearing ka la ïaid beit bad ka la kylla long kaba jop na bynta ka Shree Cement namar ki pulit ki la khang lynti ha Shnongrim ïa ki nongshong shnong jong ka thaiñ kiba pyrshah ïaka jingtih mawshun ban leit sha ka public hearing ha ka jaka ban ai jingïada ïa ki briew kiba pyrshah namar ka long ka hok jong ki.
Kumban shu pynkynmaw ha ka miet jong ka 30 tarik Naitung, ka kali kit nongpang jong ka JSU ka la shah lynthem maw ha Umpleng bad u draibar ryngkat u nongbud kila mynsaw jur, katba ka dang thmu ban leit ai jingïarap ïa briew kiba mynsaw na ka jingshah kawang lyer pynsat khmat.
Katba haka step jong ka 31 tarik ki sengbhalang kiba thmu ban leit sha katei ka jingpynsngew paidbah kila shah lynthem maw bad shah siat da ka jri siat sim. Nangta bun ruh ki kali kila julor ki ïit naka jingshah ther maw. Nalor kata kala don ruh ka jingtih pynjulor ïaka surok PWD bad ka surok khlaw ban leit sha jaka pynlong public hearing.
Ha kane hi kajuh ka step, kawei ka longkmie kaba la suhkhun na ka shnong Shnongrim kala hap ban kylliang kali namar ka jingtih pynjulor ïa ka surok.
Kumjuh ruh ki nongrep ka Shnongrim kila mih paidbah ryngkat ki placard ban leit pynpaw jingpyrshah ïa ka jingthmu khlong mawshun ka Shree Cement hynrei kila shah pakhang lynti ha ki pulit.
Ha kane ka public hearing la sakhi ruh ïa ka jingkhang khyrdep jong ki dukan naduh naduh Sookilo haduh ïew Cement.
Ki kynhun sengbhalang ki bym shym la lah ban wan, kynthup ïa ka JSU, KSU, JNC bad ka Meghalaya Indigenous Women’s Council (M.I.W.C), ki la pynpaw ïa ka jingsngew diaw bad pynrem ruh ba ki la shah khang ban leit sha katei ka jingbishar namar ki pakhang lynti bad shah pynthut.
