Shillong, Naitung 31
U nongïalam ka UDP uba long ruh u Nongaibuit ka tnad Social Welfare, u Bah Paul Lyngdoh ha ka Sngi Thohdieng u la ong ba ka Sorkar Jylla ka dang pynkhreh ban pynngat sa ïa 10 ngut ki briew hapoh ka ‘PIT NDPS-Act’ kum shi bynta ban pynjur ïa ka jingkhynra halor ki kam khaïi drok be-aiñ.
Haba kren ha ka prokram pynsngewthuh paidbah pyrshah ïa u drok, “Pulse of the Hills, Every Beat Against Drugs” ha Shillong, u Bah Paul u la ong ba la pynïar ïa ka jingpynjari aiñ sha kito ki jaka ki bym shym la shah kynthup mynshwa.
“Ka jingshisha ka long ba mynta la sdang ïa ki jingkhynra ha ki jaka ki bym ju pynlong ha ki por ba la dep, ka dei ruh kawei pat ka jingjop kaba khraw jong ka Sorkar Jylla. Kum shi bynta jong kata, ka tnad ka dang pynkhreh ïa ka thup kyrteng jong 10 ngut ki briew ki ban pynngat hapoh ka PIT NDPS khnang ba kan khanglad ïa kane ka kam runar bad jingkhaïi be-aiñ,” u la ong.
U la bynrap ba ïa kane ka kam dei ban pyndep hapoh kumba ar bnai. U Bah Paul u la pyntip ruh ba ka jingset patok ha ki katto-katne ki mukotduma ki barim la dep ban pynjlan sa da shisnem.
Halor ki jingtei bathymmai ban peitngor ïa ka jingwan rung u drok, u Bah Paul u la ong ba ka Sorkar ka la pyntreikam ïa ka ‘K-9 Unit’ kaba don ïa ka ‘Dog Squad’ kaba kyrpang.
“Ha ka jingïakynduh kaba khatduh bad ki lad pathai khubor, nga la pyntip ba ngi dang pyrkhat ruh halor ka ‘K-9 Unit’. Mynta kata ka la treikam. Ngi don ïa ka ‘Dog Squad’ kaba aiti lut,” u la ong.
Ka tnad kan sa buh ruh ïa ka ‘Administrative Building’ ha Rattacherra, kaba u la batai ba ka dei ka jaka rung ba kongsan na Assam bad Manipur sha Meghalaya.
“Ngi dang don ruh ha ka jingpynkhreh ban don ïa ka ‘Administrative Building’ ha ka thaiñ Rattacherra kaba long ka khyrdop jong ka Assam bad Manipur ban rung sha Meghalaya. Ngi dang buddien ruh na ka tnad Sorkar Pdeng ban thied ïa ki kali kiba lah shisha ban peitngor bad lap ïa ki jingdih be-aiñ ba pynbuaid,” la ong u Bah Paul.
Shuh shuh u la kdew ba ka Meghalaya ka mad jingeh shi kat dei namar ka jingjan jong ka bad ka ‘Golden Triangle’, bad ong ba ka Sorkar ka pynïasoh lang ïa ki kam pulit kiba kham pyrkhing bad ki jingpynsngewthuh paidbah hapoh ka ‘DREAM Mission’ ban pynjngai ïa ki samla na u drok.
