Shillong, Naitung 31
Ka Nandini Ishvi O. Sangma, ka samla na ka tnad pule ‘Political Science’ jong ka Don Bosco College, Tura, ka la mihkhmat ïa ka India ha ka jingïalang ba 13 jong ka ‘Commonwealth Youth Parliament’ (CYP) kaba la long ha Sydney, Australia.
Ka Sangma ka la ai artylli ki jingkren kiba pynpaw ïa ka jinglong kyrpang jong ka Meghalaya bad ban rah ïa ki mat halor ka jinglong ba ïa-ryngkat, ka synshar paidbah bad ka jingpyndonkam hok ïa ka teknoloji hakhmat ki ‘Delegate’ na kylleng ka ‘Commonwealth’.
Ka la kren ruh shaphang ka imlang-sahlang jong ka Meghalaya kaba ai jait sha ka kmie, ki jingkieng-jri, ka kyrdan kum kawei na ki jaka ba jur slap tam ha pyrthei, bad ka nam jong ka kum ka “Rock Capital of India.”
Halor ka jingai jait sha ka kmie, ka Sangma ka la pynshai ba watla ïa ka pateng mynbarim la wad lyngba ka kmie bad ïa ki jingdon-jingem la hiar pateng sha ka khun kynthei bakhatduh, hynrei kam mut pat ba kane ka buh ïa ki kynthei kham halor ïa ki shynrang.
Ka la batai ruh ïa ka kum ka rukom kaba saiñdur ïa ka jinglong-jingman ka imlang-sahlang jong ka Jylla.
Ka la kdew ba katei ka bynta dalade kam pyntikna hi ïa ka jingïaryngkat, bad ban jur ba dei ban bishar ïa ka imlang-sahlang lyngba ki lad ki kabu kiba ïaryngkat lang na ka bynta baroh.
Halor ki ‘Gender Issues’, ka la buh jingkylli ba balei ki kynthei ha kiba bun ki bynta jong ka pyrthei ki dang ïakhun sah na ka bynta ka jingïaryngkat ha u snem 2026.
Ka la kdew halor ka jingbym ïoh bynta jong ki kynthei ha ka pule-puthi, bad ka jingpyndonkam ïa ki kam thombor ha ki jingïakynad, bad ka la wer na ka bynta ka jingkut jingmut kaba kham khlaiñ haba phai sha ka hok bad ka burom briew.
Haba kren halor ka ‘Artificial Intelligence and Democratic Integrity Bill 2026’, ka Sangma ka la ong ba dei ban pynwandur ïa ka AI da ka jingkitkhlieh ban pynkhlaiñ ïa ka synshar paidbah.
Haba pdiang ïa ka bynta jong ka ha ka pule-puthi, ka koit ka khiah, ka jingsynshar bad ka jingshakri paidbah, ka la ong ba ka teknoloji kam lah ban mih bujli ïa ka jingsngew jong u briew, ki jingshem ha ka jingim, ka jingbishar paidbah bad ka jingshaniah jong ki paidbah ha ki nongmihkhmat ba la jied.
