Shillong, Naitung 31
Ka kynhun ki khynnah samla hapoh ka jing-ïalam jong u nongïaid kjat ba pawnam, u Welkin Stone Shadap ha ka Sngi Thohdieng ki la sdang ïa ka “Walking With Purpose” da ka jingthmu ban ïaid kjat 150 km bad ban pynsaphriang ïa ka jingïalam pyrshah ïa ka jingdih drok.
Ïa kane ka prokram ba la pynlong da ka “Welkin Walks” ryngkat ka jingïatreilang ka DREAM Mission bad ka tnad Social Welfare, la sdang na Lum Mawnei ha Mawlai bad ka la long ka jingïaid kaba jngai ryngkat ka jingïalap paid -bah ban pyrshah ïa u drok ha ki jaka pule.
Kum shi bynta jong ka prokram ha kaba sdang, ki nongïashim bynta ki la leit ban jngoh ïa ka Seven Huts Secon-dary School bad hadien pat sha ka Sun Rays Higher Secondary School, Mawlai Nong-lum, ha kaba la pynsngewthuh ïa ki khynnah skul halor ka jingsniew jong ki jingdih buaid bad la pynshlur ïa ki ban jied ïa ki lynti ba bha ha ka jingim.
Haba kren ha kane ka prokram, u Bah Shadap u la ong ba kane ka jingthmu ka pynpaw ïa ka jingpher na ka jingïaid kjat ba jngai ba la ju leh mynshwa ha kylleng ki District bad ki Jylla sha ka jingïakynduh markhmat ïa ki khynnah pule ban hikai ïa ki shaphang ki jingma u drok ha ki jaka pule jong ki.
U la ong ba ka kynhun ka thmu ban ïaid 150 km ha ki lai sngi, da kaba buh thong ban ïaid 50 km man ka sngi, katba ki dang pynlong ïa ki jinghikai ha ki skul kiba don ha shilynter ka lynti.
Haba pdiang sngewbha ïa kane ka jingthmu, ka Kong Philwansha Jana kaba dei ka nonghikai jong ka Sun Rays Higher Secondary School ka la ong ba kum kine ki prokram ki ai mynsiem ïa ka jingpyrshang jong ki skul bad ki kmie ki kpa ban pynsngewthuh ïa ki khynnah skul shaphang ka jingma na ka jingdih buaid.
Ka la ong ba ka jingïakynduh ïa ki nongai jingkren ka la ïarap ïa ki samla pule ban sngewthuh kham bha ïa ki jingma kiba lah ban mih na ka jingdih drok bad pynshlur ïa ki ban jngai na kum kine ki jingmlien.
