Shillong, Naitung 31
Ki kynhun jong ki nonghikai kumjuh ki khynnah pule kiba don hapoh ka Skulbah North-Eastern Hill University (NEHU) ki pynpaw ba ki pdiang ïa ka jingthung Vice Chancellor (VC) ba shipor ka tnat pule puthi ka Sorkar Pdeng ïa u Prof. Saroj Kanta Barik ba un long u nongpeit bad pynïaid beit ïa ki kam ba bun hapoh ka Skulbah.
Haba ïakren sha ki nongthoh khubor u Prof. Lakhon Kma President ka North-Eastern Hill University Teachers’ Association (NEHUTA) u la pynshai ba ka jingthung VC ïa u Prof. Barik kam dei kaba biang eh, namar ïa ka shithi thungkam jong u la mynjur da ka President jong ka Ri bad ka don hok ban thung VC u ban pynïaid ïa ki kam kum u VC tad ynda la ïoh ïa u VC ba pura jong ka Skulbah.
Haba ïadei ka jingkynnoh ka HYC ba ka tnad ka la pynkheiñ ïa ka kyndon jong ka NEHU, u Prof. Kma u la pynshai ba ha ka shithi thungkam jong u Prof. Barik la kdew shai ba la thung VC thymmai ïa u nonghikai ba wan ba-ar ha ka jingslem ka jingai jingshakri hapoh ka Skulbah.
Shuh-shuh haba ïadei ka jingkynnoh ba khlem don ka jingkynjoh ktien ne tyrwa ïa u Prof. R Khongsdier uba la rangbah tam ha ka jingai jingshakri ha NEHU, u Prof. Kma u la pynshai ba ka tnad ka la shim jingtip na ka Statutory Body jong ka NEHU bad u Pro VC ba don ha ka por jong u Prof. Prabha Shankar Shukla un ym don hok ban ai jingmut ïa ka tnad pule puthi ba ïano ban thung VC.
Haba ïadei ka jingdawa ka HYC ba u Prof. Barik u dei ban aiti noh ïa ka kam VC ba shipor sha u Prof. Khongsdier, u Prof. Kma u la ong ba kane ka jingdawa ka long kaba bakla bad kaba ym don nongrim hano-hano ruh, namar ïa u Prof. Barik la thung ban peit ïa ki kam kum u VC tad haduh ba la ïoh ïa u VC ba pura.
U Prof. Kma u la ong ba ha ka por ba don ka kynrum kynram hapoh ka NEHU jan baroh ki kynhun kiba don hapoh ka Skulbah ki la ïadon bynta ban pynpaw ïa ka jingsngewkhia, kum ka KSU NEHU kaba la shim ïa ka sienjam ban shah thngan haduh 15 sngi ban dawa weng ïa u Prof. Shukla, hynrei ym ïohi ba ka HYC kan mih shakhmat ban sngewlem, katba mynta ka long ka man hapoh NEHU ka la sdang ban jai-jai ka mih ban woh kjat bad ki jingdawa ruh kiba ym don nongrim.
Haba ïoh ban ïakren ïa u President ka NEHUSU u samla Menlamlynti Markhap u la pynpaw ba kam don ban ong eiei namar ba ka jingthung ïa u Prof. Barik ka long tang shipor ban shim ïa ka bynta ban pynïaid ïa ki kam kum u VC hapoh ka Skulbah.
U la ïathuh ba ha ki por ba la dep ba ka NEHU ka don hapdeng ki jingeh namar ka jingbym don u khlieh ban peit ban pynïaid ïa ka Skulbah ki la leit sha u Prof. Khongsdier ban kyrpad ban shim ïa ka kam ban pynïaid ïa ki kam u VC, hynrei u la kyntait ban pdiang ïa ka jingkyrpad bad kane hi ka pynpaw ba u kyntait ban shim ïa ka kam VC bad ka dei hi na kata ka daw ba ka tnad pule puthi ka Sorkar Pdeng ka thung ïa u Prof. Barik ban long kum u VC ba shipor ka NEHU.
Shuh-shuh ka NEHUTA bad NEHUSU ka pynpaw ba kam don eiei ban kynnoh ne kynthoh haba ïadei ka jingthung VC ïa u Prof. Barik, hynrei ka jingkwah bad ka jingangnud hi ka long ba ka skulbah kan don hapdeng ka suk ka saiñ bad ba ki kam kin ïaid beit ïaid ryntih nangne shakhmat ha ka jingpynïaid u VC ba mynta.
