Shillong, Nailur 09
U Myntri ka tnat jngohkai ka Jylla, Bah Paul Lyngdoh u la pynshai ba dang shen ka Sorkar ka la dep pynlong jingïalang arsien bad ki kynhun bapher bapher naduh kiba pynïaid kali ba pynïaid ïa ki ïingbasa lane jaka sah ki nongjngohkai bad ki nongkdew lynti ïa ki nongjngohkai ha kaba la ïakren shibun
ki jingeh bad jingdonkam ha kane ka Jylla, ha kaba la baroh la pynpaw bad ïakren lang ba ka Jylla ka dang duna sa kumba 3000 tylli ki kali ban kit ïa ki nongjngohkai.
U Bah Paul u la pynpaw ïa kane haba kylli halor ka jingkynnoh ka kynhun All Khasi Meghalaya Tourist Taxi Association ba ka Sorkar ka leh kuman bad khlem pyrkhing ïa ki kali kiba nabar kiba kamai ban kit ïa ki nongjngohkai.
U Bah Paul u la ong ba kam long kaba suk ban ïakren lut bad kawei-pa-kawei ka kynhun namar ki kynhun bapher-bapher ki la wanlang kawei ban ïakren ha ki ar tylli ki jingïalang kiba la khot pynlong da ka Sorkar.
U Bah Paul u la ong ba ha ka aiñ jong ka ïoh ka kot ka ju don ka jingdawa bad jingpynbiang (demand and supply). “Kumta ka don ka jingduna ki kali kumba lai hajar tylli ban kit ïa ki nongjngohkai tang hangne ha Meghalaya. Kine ki kynhun nongñiah kali ki dei ruh ban ïakren bad ki para nongñiah kali kiba na Assam namar ba ka jingshisha ka long ba ka Meghalaya ka shaniah ha ki nongjngohkai kiba wan na Assam ym ba ka Assam ka shaniah ban wan ki nongjngohkai sha Assam.
U Bah Paul u la ong ba naduh ka lad liengsuiñ kaba biang, ka jaka sangeh rel bad katto-katne ki jaka sumar ba biang tam ha Shatei Lam Mihngi ki don ha Guwahati ha kaba ki nurse na Meghalaya bad kiwei kiwei kiba treikam ki trei ha kylleng ki jaka ha Assam.
“Kumta kane ka mat ka long kaba kham khluit bad ki hap ban tip da ka lynti kaba kumno kin ïaid, ha kano ka rukom kin ïaid, bad ban pyntikna ba ha kane ka jingkwah kham bun, phin nym siat pynban ïa ka kjat lajong,” la ong u Bah Paul.
