Nongstoiñ, Nailur 09
Ki nonghikai skul SSA kiba don hapoh ka shatri jong ka All Meghalaya SSA Schools Teacher’s Association (AMSSASTA) ha ryngkat bad ka All Garo Hills SSA Schools Teacher’s Association (AGHSSASTA) ki la shim ïa ka rai ban dawa ba ka Sorkar Jylla ka dei ban kyntiew noh ïa ka jingsiew kaba 100% sha baroh ki nonghikai SSA.
Ïa kane la pynpaw da u Babu Peter Thyrniang haba ïakren sha ki lad pathai khubor hadien ba la wai ka jingïalang jong ki nonghikai skul SSA kiba hap hapoh ka All Meghalaya SSA Schools Teacher’s Association (AMSSASTA) ha ryngkat ka All Garo Hills SSA Schools Teacher’s Association (AGHSSASTA) ha ka Sngi Saitjaiñ jong ka taïew, ïa kaba la pynlong ha Nongstoiñ na ka bynta ban ïakren halor ki jingdawa na ka sorkar Jylla ban kyntiew ïa ka jingsiew sha ki nonghikai SSA.
Ïa katei ka jingïalang kaba la long hapoh ka Hall jong ka School Mount Hermon ha Nongstoiñ, la sakhi da ka jingïadon ryngkat lang ruh u Bah Peter Thyrniang uba dei u President ka AMSSASTA Sengkmie, u Bah Wanpyndaphi Langpang Assistant Secretary, u Labingstone G Momin President ka AGHSSASTA, u Benabith Marak, General Secretary, ki nongkitkam na baroh ar tylli ki Synjuk ki nonghikai na kylleng ki District.
U Babu Peter Thyrniang u la ong ruh ba ha katei ka jingïalang ki nonghikai ki la pynbna ruh ba kin ai por hapoh mynta u bnai ïa ka sorkar ba kan ai ïa ka jubab kaba shai halor katei ka bynta lym kumta kin pynlong da ka jingïakhih kaba tyngeh da kaba shong kyllaiñ myngor khlem buh por.
