Shillong Nailur 09
U Myntri Rangbah barim ka Jylla, u Dr Mukul Sangma u la pynrem jur halor ka jingïada ka Sorkar Jylla ha kaba ïadei bad ka jingshim ram bad nangkiew ka ram bad ka jingbymbiang ha ka rukom pynïaid ïa ka pisa tyngka.
Haba kren sha ki lad pathai khubor, u Dr Mukul u la ong ba ka Sorkar ka la ïada jubor wat hadien ba la kdew lyngba ka kaiphod Comptroller Auditor General ka ri India ba ki don shibun ki jingbakla ha ka rukom pynïaid ïa ka pisa ha kaba ka Sorkar Jylla ka bteng ban len bad kyntait wat haba la nangkiew ka ram kaba ka Jylla ka la shim.
U la ong ba ka Sorkar ka bteng ban shimram ban siew ïa ka ram kaba la don lypa kaba long ka jingma ha ki sngi bad ki por ban sa wan bad kane ka long ka jingbuh jingeh ïa ka pateng.
U la ong ba ha ka por jong ka Sorkar kaba ma u u ïalam kum u Myntri Rangbah ka Fiscal Deficit lane ka jingduna ha ka mang tyngka kam ju palat ïa ka 3 percent, hynrei ha kane ka Sorkar ka fiscal deficit ka la palat ruh ïa ka 4 percent ha kaba ki aidaw ruh ba ka Sorkar Pdeng ka shah ban shimram katkum ki kyndon.
U la.ong ba ka Sorkar ka ïada da kaba ong ba ym dei ban khuslai ïa ka jingshimram, hynrei ka don ka jingkhuslai ïa ki por ban sa wan.
U la pyni nuksa haba siew ïa ka EMI kaba 75 hajar tyngka shibnai bad lada ka jingïoh ka long tang 50 hajar tyngka kumno yn siew ïa ka EMI kaba 75 hajar da kaba shu shimram biang sa 25 hajar tyngka.
“Kumno phin shu shimram ban siew ïa ka ram? Ka long kaba eh ban ïoh jingshaniah wat na ki nongai ram haba ka jinglong jingman ka pisa tyngka kam biang. Baroh ka shong eh ha ka jingkoit jingkhiah kaba ka Jylla ka ïoh ha ka Liang ka pisa tyngka. Kumta kano kano kaba phi shimram dei ban pynwan ha kata ka rukom ba phin iohnong na kata ka ram khnang ban lah ban siew pat,” la ong une u nongïalam ka Liang Pyrshah.
U Dr Mukul u la ong ba ruh ba haba ka ai jingkheiñ ba ka jingïoh pisa kan kham kiew, ka jingshimram ruh ka dei ban kham hiar hynrei kane kam long kumta ha kane ka Sorkar namar ka nang kynton ïa ka ram na uwei u snem sha uwei pat u snem.
Halor ka jingkam ka Sorkar ba ka ka ïoh pisa shuh (bonus) namarba biang ka rukom pyndonkam ïa ka pisa kum ka Jal Jeevan Mission (JJM) na ka Sorkar Pdeng, u Dr Mukul u la ong ba ka JJM ka dei kaba shu biang tang ha ki kot ki sla hynrei ha madan kam biang satia bad ma un sa leit hi dalade ban peit ha madan.
“Hato phin leit katkum ki kot ki sla kiba la pyni ba ka long kaba biang ne phin leit da ka jingshisha ban shakri ïa ki paidbah?” u la kylli.
