Shillong, Nailur 10
Ka jingshah prong tuh jong ki ïing ha ki bynta jong ka nongbah Shillong ka la sdang ban jur ha kine ki sngi, namar tang ha ka taïew ba la dep ki la don ar tylli ki ïing kiba la shah prong tuh bad shah rong ei ka ksiar bad ka pisa.
Katkum ka khubor na ki pulit la ong ba ka Kong May Queen Kharphuli ka la ujor ba ha ka 7 tarik mynta u bnai, ki briew ki bym lah ban ithuh durkhmat ki la prong tuh shapoh ka ïing sah jong ka kaba don ha Nongmensong ha Dongkamon, Shillong bad ban rah tuh ïa ka ksiar kaba shongdor kumba T.1.58 lak bad ka pisa kaba don haduh T.98 hajar.
Ha kawei pat ka khubor, ki pulit ki la pyntip ba ka Sudipa Bhattacherjee ka la ai ka jingujor ba ha ka janmiet jong ka 6 tarik mynta u bnai, ki briew ki bym lah ban ithuh durkhmat ki la prong tuh shapoh ka ïing jong ka kaba don ha Golf-Links, Pdengshnong, Shillong bad ban rah tuh ïa ka ksiar, ka baje bad ka pisa kaba long T.20 hajar.
Ha kaba ïadei bad kane, ki pulit ki la pynlong ka jingtohkit bad ban thwet ïa ki briew kiba donkti ha kane ka kam tuh kam thiem.
