Shillong, Nailur 18
Ki nongthoh khubor na Uttar Pradesh, ha ka ‘Press Tour’ ba la pynlong da ka Press Information Bureau (PIB), ka Sorkar India, ki la leit jngoh ïa ka shnong Siej kaba don ha East Khasi Hills bad ki la ïakren bad u Bah Hally War uba la ïoh ïa ka khusnam ‘Padma Shri’, uba la ïalam ïa ki sha ka jingkieng-jri ha Umkhar.
Ha kane ka jingleit jngoh, u Bah War u la batai kumno ïa ki tynrai kiba don halor jong u diengjri (Ficus Elastica) la pynïaid bad sumar bha da ki snem ban pynlong ïa ki jingkieng lyngba ki wah bad ki jaka kiba jynjar kiba ki briew ki lah ban pyndonkam.
U la ïathuh ruh kumno u la nang ïa kane ka rukom shna tynrai na u kpa bad u kpa tymmen jong u bad u la aiti da ki phew snem ban pynneh-pynsah ïa kane ka jingstad tynrai bad ban hikai ïa kiwei shaphang kane.
Lyngba ka jingïaid ryngkat bad u Bah War sha Umkhar, ki nongthoh khubor ki la peit bniah ïa ka jingkieng-jri bad ki la sakhi ïa ka mariang sawdong jong ka shnong Siej. Ki la pynpaw ka jingsngewnguh ïa ka lad ban sakhi ïa kane ka dustur tynrai ha ka jaka ba ki don bad ki la ong ba ka jingïakren ka la ai ïa ki ïa ka jingsngewthuh kaba kham bha shaphang ka jingïadei kaba ïajan hapdeng ki jaidbynriew Khasi, ka mariang jong ki bad ka jingstad tynrai.
Ki nongthoh khubor ki la ai khublei ruh ïa ka jingstad bad jinglah ban pynneh-pynsah ïa ka dustur shna jingkieng dieng-jri, da kaba ong ba ki jingtei ki pyni ïa ka jingnang-jingstad jong ka imlang-sahlang kaba la slem bha ban trei bad ka mariang.
Ki la ai khublei ruh ïa u Bah War uba la ïasam ïa ka jingtip bad ka jingïaid lynti shimet jong u bad ki la pynkup burom ïa u kum ka jingithuh ïa ki jingpyrshang jong u da ki phew snem ban pynneh-pynsah ïa ka dustur tynrai. Ki la ai khublei ruh ïa u ha ka jingïoh ïa ka khusnam ‘Padma Shri’ ha u snem 2026.
Ki nongmihkhmat na ka Information and Public Relations (DIPR), Sorkar Meghalaya, ki la synran lang ïa kane ka kynhun ki nongthoh khubor ha kane ka jingleit jngoh.
Kane ka jingleit jngoh ka la long shi bynta jong ka ‘PIB Press Tour’ kaba thmu ban ailad ïa ki nongthoh khubor ba kin ïohi markhmat ïa ka kolshor jong ka Meghalaya, ka jingstad tynrai, ka mariang bad ki sienjam ba ïadei bad ka kam jngohkai pyrthei ba la pynshong nongrim ha ka imlang-sahlang.
