Nongstoiñ, Nailur 18
Ka Federation of Khasi Jaiñtia & Garo People (FKJGP) Rimuliang Circle ka la pynpaw ïa ka jingsngewkhia bad sngewbitar kaba jur halor ka jingpynsahteng jong ki 2 tylli ki Sorkar ba kynthup ïa ka Sorkar Meghalaya bad Assam ban pyndep noh kloi ïa ka mat ïakren pynbeit pud.
Halor kane ka bynta, ki nongïalam ka FKJGP ki la pynpaw ba ha ka 18 tarik u bnai Nailur, 2026 ka seng ka la ïoh ruh ban pynlong ïa ka jingïalang ha Langpih.
U Bah Serbilin Lyngdoh, President FKJGP, Rimuliang Circle u la ong ba ka jingïai pynsahteng ïa kane ka mat ka la wanrah shibun ki jingeh hapoh ka dong ka thaiñ hi baroh kawei.
“Ngi pynrem jur ïa ka jingwan leh donbor jong ka Assam ha kaba wan kem ïa ki nongtrei bylla kiba trei ïa ka ‘building’ jong ka Aganwadi Centre ha Noapara ba la ïoh na ka skhim Sorkar napoh ka Jylla Meghalaya kumjuh ka jingwan pynsangeh ïa ka jingtrei ïa ka Health Sub-Centre ha Kompaduly, ka jingwan pynthut ïa ki SHG kiba rep sohtrun ha ka shnong Borkhuli,” ong u Bah Serbilin.
Shuh shuh u la ong ba kine ki jingïai wan pynthut jong ka Assam ïa ki briew jong ka thaiñ ka pyni ïa ka jingbym khein snep jong ka Sorkar Assam ïa ka mon laitluid jong ki paidbah nongshong shnong.
U Bah Serbilin u la ong ruh ba ka seng ka dawa jur ba ka Sorkar Meghalaya kan ai jingïada ïa ki paidbah nongshong shnong ha ka thaiñ bad pyntikna ba kitei ki kam pynroi ha Noapara, Kompaduli bad Borkhuli kim dei ban sangeh hynrei ki dei ban ïaid beit shakhmat bad lada ka Sorkar kam lah ban pynïaid shaphrang ïa kitei ki projek, ka la dei ka por ba yn hap mih pyrshah ban ym shah shuh ïa ka Assam ruh ba kan wan pyntrei ïa kino-kino ki projek hapoh ka thaiñ.
