Shillong, Nailur 18
Ka Khasi Students’ Union (KSU) Central Executive Council, ka pynpaw ïa ka jingbym sngewtynnat halor kaei kaba la jia ha ka step synñia ha Nongbah Shillong, ha kaba kawei ka Scooty ba la ñiah da ki briew kiba ym pat shym la pynshai kyrteng, ka la tynrah ïa u Additional SP jong ka tnad pynïaid kali, uba dang don ha ka kam.
Ka KSU ha ka kyrwoh ba la phah ha ka janmiet jong ka 18 tarik u Nailur 2026, ka la pynpaw ka jingsngewkhia halor kano-kano ka jingjia kaba lah ban pynmynsaw ïa ki briew lane ïa kino-kino ki briew ka aiñ bad ki paidbah. Hynrei, kaei kaba pynlyngngoh bad pynkyndit ïa ka seng ka long ka rukom kaba la sdang mih ki jingkynnoh, khamtam ha kaba la pynïasnoh beit ïa kitei ki nongñiah Scooty bad ka KSU.
Katkum ki khubor kiba la mih na ka tnad pulit hi la suba bad kynnoh ba kitei ki briew kidei ki dkhot jong ka KSU. Hynrei ka jingkylli kaba ka KSU ka buh mynta ka long: Ha kano ka nongrim la pynshong nongrim ïa kane ka jingkynnoh? La ïoh jingtip shisha ne tang ka jingmutdur? Ka seng kan ym lah ban pdiang da lei-lei ruh ïa kine ki jingkynnoh ba khlem shongnia.
Hato mynta kino-kino kiba ñiah Scooty ha nongbah Shillong, kidei ban long ki dkhot ka KSU? Lane lada don ka jingjia ba pynkyndit, kan suk ban shu kawang noh ka jingkynnoh sha ka seng kaba don ka kyrteng ha ka imlang sahlang?
Ka KSU ka pynrem jur ïa ka jingpyrshang ban pynsaphriang ïa ki jingkynnoh kiba khlem pynshisha bad khlem nongrim. Lada don ki briew kiba la pynkheiñ aiñ, to kem ïa ki, pyni ïa ki sakhi, pyni ïa ki dur CCTV lada don, bad pynshisha ha ka Ïingbishar. Ka aiñ kadei ban treikam halor ki sakhi, ym halor ka jingmutdur lane ka jingkynnoh.
Kumba ngi ju ïohi na ka por sha ka por, khamtam ha ki bynta bapher-bapher jong ka Nongbah Shillong, bun bha ki nongñiah arshaka ki don ha surok ha man la ka por. Kumjuh ruh, ka jingjyllei jong ki briew kiba kyrni ha ki jingdih pynbuaid bad kiwei ki jingdih kiba sniew ka long kawei na ki jingeh kaba la ju ud ju khñium da ki paidbah. Kumta, mano ban tip, mano shisha kiba ñiah ïa katei ka Scooty bad ha kano ka jinglong ki don ha kato ka por?.
“Ngim ong ba kitei ki nongñiah Scooty, kidei kiba khlem don jingkitkhlieh, hynrei ngi ong shai ba watla ki dei ki dkhot jongno-jongno ruh , ka aiñ kadei ban wad ïa ka jingshisha bad ban pynshitom tang ïa kiba donkti,” la ong ka KSU.
Bad lada ki pulit ki don ki sakhi kiba pyni shai ba kitei ki nongñiah kidei ki dkhot ka KSU, to pyni ïa ki sakhi bad shim ïa ka lynti katkum ka aiñ. Ka KSU kam kyrpad ïa kano-kano ka jingisynei lada don dkhot jong ka seng kiba la leh bakla. Hynrei ka Seng kan ym ailad ruh ban pynthohbria ïa ka kyrteng jong ka tang da ki jingkynnoh kiba khlem nongrim.
Ka long ruh kaba sngewlyngngoh ba ha ka por ba ka nongbah ka dap da ki arshaka, yn shu mih noh ka jingmut ba “Ki dei ki dkhot KSU.” Hato lada ka Scooty ka tynrah ïa u paidbah, yn kynnoh ruh ba dei ki dkhot KSU? Lada ka tynrah ïa u pulit, dei beit ban kynnoh ba dei KSU?. Kane kam dei ka rukom treikam jong ka aiñ.
Ka KSU ka pynshai ba ka seng ka tip bha ïa ka jingkitkhlieh jong ka kum ka seng. Ngi kyrshan ïa ka aiñ bad ka jingshngaiñ ha surok, hynrei ngi pyrshah jur ïa kano-kano ka jingpyrshang ban pyndonkam ïa ka jingjia kum kane ban pynjah burom lane ban pynsaphriang ïa ki jingkynnoh pyrshah ïa ka Seng khlem da don ki sakhi kiba shai.
“Ngi kyntu ïa ki bor pynïaid kali bad ki pulit ban pynlong ïa ka jingtohkit kaba khuid, bad kaba pynshong nongrim tang ha ki sakhi. Ym dei ban don ar tylli ki dur jong ka aiñ kawei ïa ki paidbah bad kawei ïa kiba don ha ki seng,” la ong ka KSU.
Ka la ong ruh ba lada ki nongñiah ki la leh bakla, kem bad pynshitom katkum ka aiñ. Lada kidei ki dkhot KSU, pyni ïa ka sakhi. Hynrei lada ym pat don kano-kano ka sakhi kaba biang, wat pynlong ïa ka jingkynnoh kum ka jingshisha.
Kumta ka ka KSU ka la ong ba kan ym pdiang ïa ka rukom kaba shu kynnoh sha ka seng khlem nongrim. Ka kyrteng jong ka KSU kam dei ka jaka theh ïa ki jingbakla jong kiwei pat ki briew.
