Shillong, Nailur 18
U Bah Ardent Miller Basaiawmoit, President ka Voice of the People Party (VPP) u la ong ba ka jingmih ka jingkynnoh ba ka District Council hapoh ka jingïalam ka VPP, ka thmu ban pyntroiñ ïa ka niam tynrai, kane kadei tang ka nia ilekshon bad ka nia politik.
“Ka jingkynnoh ban ong ba ka EC ka la wengnoh ïa u Syiem ka Hima Mylliem, namar ba u dangdon ha ka niam tynrai, ka jingpyrkhat ban weng ïa u Syiem Khyriem uba dang don ha ka niam tynrai, ka jingbym ai sanad ïa u Syiem khynnah ka Hima Sohra kadei namar ba u dang don ha ka niam tynrai, hynrei kine baroh kidei tang ki nia ilekshon bad nia politik,” la ong u Bah Ardent.
U la ong ba ka jingshisha ban wengnoh ïa u Syiem ka Hima Mylliem, kadei namar ka jingbym beit ka rukom treikam, bad shibun ki kynrum kynram bad kiba don ka jingsuba bamsap kaba shyrkhei hapoh ka jingtrei kam jong ki.
U la pynshai ba ka jingbym ai sanad ïa u Syiem khynnah ka Hima Sohra kadei namar ba kam ïaid katkum ka riti dustur jong ka Hima Sohra. Bad ka jingujor ka la wan na kiba don bynta hi kata ka kam
“Ka jing ong ba ka EC jong ka District Council, ka la pynïeng shibun ki khyrdop lum khajna kiba beaiñ, kane ruh kadei tang ka nia ilekshon. Baroh ki khyrdop lum khajna kiba ka District Council ka pyntreikam, kidei kiba long katkum ka aiñ bad ka la don ka jingduna kaba bun ha ka por ba ka VPP ka sdang pynïaid ïa ka EC. Kane kadei ka hok hi jong ka District ban lum khajna ban kyrshan bad ban pyntyllun ïa ki kam,” la bynrap u Bah Ardent.
