Mawkyrwat, Nailur 10
U Acting Syiem jong ka Hima Langrin, u Pa’iem Bryllyen Henry Syiemïong ha ka 10 tarik u Nailur 2024 u la leit jngoh bad noh jingïarap ïa ki khun ki hajar ka Hima Langrin kumba T.1 klur tam ka pisa.
Ïa kane ka jingïarap sha ki khun ki hajar ka Hima, u Acting Syiem u la sdang shwa na ka shnong Wahkaji, South West Khasi Hills ha kaba u la ïoh ban sam ïa ki shi hajar tam ki nongshong shnong jong ka Wahkaji mar T.1000 marwei kynthup naduh ki khyllung ba dang kha haduh kiba la tymmen.
Nalor katei, u Acting Syiem u la ïathuh ba ka Dorbar Hima ka la rai ban ai jingïarap ïa kito kiba pang ba shitom, kiba don jingduna ha ki dkhot met bad ïa ki samla ba pass bha ha ki eksam bapher bapher mar T.4000 bad yn ai ruh ïa ki Sordar ne ki Secretary shnong kiba trei bha ha ki shnong ki thaw T.5000.
Haba kren sha ki lad pathai khubor, u Acting Syiem Bryllyen Henry Syiemïong u la ïathuh ba katei ka pisa kaba la sam sha ki paidbah, ka dei ka pisa jong ka hima kaba ïoh na ka bai khyndew (land compensation) ha kaba ïadei bad ka jingker sainar na Mawpyllun shaduh Chiragoan kaba kot baroh sha ka T.2 klur 15 lak.
U la ïathuh ruh ba na ka liang ka Hima ka la rai ba ïa kane ka pisa yn sam sha ki khun ki hajar jong ki 28 tylli ki shnong jong ka Hima Langrin khnang ba kin ïoh ïa ki jingmyntoi ha ki longïing longsem namar ba ha kine ki arsnem ka don ka nem sniew kaba khraw hapoh ka hima namar ka jinghiar dor ki mar rep naduh u synsar, kwai, tympew bad kiwei kiwei ha kaba bun ki longïing longsem ki don hapdeng ka jingduk jingkyrduh kaba khraw.
Na ka liang ki paidbah nongshong shnong jong ka Wahkaji hadien ba ki la ïoh pdiang ïa katei ka pisa, ki la pynpaw ïa ka jingsngew kmen bad ai khublei ïa ka ophis jong u Acting Syiem kiba la ai sngewbha haduh T.11 lak ïa ki nongshong shnong.
Ka jingleh jong u Acting Syiem ka la pynkmen shibun ïa ki nongshong shnong khamtam kum ha kane ka por ba ki mad ïa ki jingeh jingkyrduh bad ki la pynpaw ruh ba kane ka jingleh jong u Acting Syiem ka la long ka histori hapoh ka Hima Langrin ha kaba ym pat ju don kiwei pat ki Syiem kiba lah ban ïarap ïa ki paidbah.
Ka shnong Wahkaji ka ai ka jingkitbok kitrwiang ruh ïa u Acting Syiem ba un dang shait dang khlaiñ bad lah ban pyndep ïa shibun ki kam ka ka bynta ban pynïaid shaphrang ïa ka hima.
