Shillong, Nailur 10
Hadien ba ka la mih ka jingkynnoh ba uwei u pulit ha ka kyrdan Sub Inspector (SI) u la kyntait ban pdiang ïa ka ejahar na kawei ka kynthei ha thanat Laban, na ka liang u Superintendent of Police (SP) ka East Khasi Hills u la thung da ka jingtohkit (departmental inquiry) ban lap ïa ki jingshisha.
Lah ban kdew ba ha ka miet jong ka 9 tarik mynta u bnai, kawei ka kynthei ka la leit ban ujor sha ki pulit ka thanat Laban ba ka shah ktah kti ha uwei u nongñiah taksi bad ha kaba ka la buh ruh da ka ejahar hynrei la kynnoh ba u pulit SI uba don ha katei ka por u la kyntait ban pdiang ïa ka ejahar.
Shuh shuh la kynnoh ba une u pulit SI u la don hapdeng ka jingshoh khawiang ha ka por ba u don ha ka kam, kaba lam sha ka jingïania kaba jur bad ki bahaïng-bahasem jong kane ka kynthei kiba leit ujor.
La ong ba hadien kane, ïa kane ka nongujor la ïarap noh da kawei ka pulit kynthei jong ka Women Police Station, kaba la pynrung kyrteng ïa ka case katkum ka ejahar.
Kumta halor kane, u SP u la thung da ka jingtohkit ba la khlieh da u Sector Officer ka thanat Laban pyrshah ïa une u ophisar. Ha kajuh ka por, ka ophis u SP ka kyntu ruh ïa ki paidbah ba kin ai jingtip haba don kum kine ki jingjia lane pan jingïarap da kaba phone ha u number 112.
Haba ïakren bad ki nongthoh khubor, u Superintendent of Police (SP) Bah Sylvester Nongtnger, u la pyntip ba ïa une u pulit Sub Inspector ka thanat Laban la weng kam shipor (sospon) bad ka jingtohkit mynta ka la ïaid shakhmat da u Sector Officer uba dei ruh u SDPO ka Pynursla.
