Shillong, Nailur 10
Ki paidbah ka dong Pdengshnong Mawryngkneng kaba hap hapoh ka Mawryngkneng Constituency, East Khasi Hills District ki la mad ïa ka jingeh bad shem jynjar ha kaba ïadei bad ka jingbym poi um sha man la ki thliew ïing haduh kine ki sngi ba mynta na ka tnat sam um ka Sorkar Jylla lyngba ka skhim Jal Jeevan Mission (JJM).
Ïa kane ka skhim JJM la pyntrei mynta la dep shisnem pura hynrei ka um pat kam shym la poi satia sha ki thliew ïing jong ki paidbah jong ka dong Pdengshnong Mawryngkneng katba sha kiwei pat ki dong kane ka um ka la poi lut.
Haba leit ban jurip halor kane ka jingbym poi ka um, ka Hynñiewtrep National Youth Front (HNYF) Mawryngkneng Circle ha ka Sngi Ba-ar ka 10 tarik Nailur 2024, ka la sakhi ba ka jingshna ïa ki top um bad ki pipe ban pynpoi ïa ka umbam shaduh ki thliew ïing briew, la shu shna thurmur bad tang ban dep khnang ban ïoh noh ïa ka pisa kham kloi katba ki pipe um ki la shu pynthiah lyngktar ha surok khlem da tap dewbilat ne thep ïa ki shapoh khyndew.
La sakhi ruh, ba ki pipe um kim dei kiba skhem bad shu ker pynskhem tang da ki maw khlem da shna pynbha.
Ha ka jingïakren bad u Bah Khrawkupar Lyngdoh Nonglait, President ka HNYF Mawryngkneng, u la ong ba ki paidbah jong ka dong bad ka thaiñ baroh kawei ki la ud-la nam halor ka jingbym pat poi ka umbam sha ki thliew ïing jong ki. Kumta ka seng mar-mar ka la leit ban peit bad lap da la ki jong ki khmat ba ïa kane ka kam, la shu shna torti shaba palat naduh u pipe um ba poi ha ka top ruh, u la shu sahkut tang hapoh ki nala.
“Ka jingtrei ka la long kaba torti shaba palat ha kaba ngi ïohi ba naduh u pipe u ba wan ha ka top um, u la shu sahkut tang hapoh nala bad ki khlem thep shapoh bad kane ka jingleh ki kontraktor lehse, ka ïalam pynban sha ka jingma-jingmynsaw”, ong u Bah Khrawkupar.
U la ong ba ka jingkhmih lynti lyngba ka jingwanrah ïa ka skhim JJM hapoh ka shnong ka thaw kan long ka jingmyntoi ïa ki paidbah hynrei ka jingleh thumur pat jong ki kontraktor ïa ki pipe um, ka la wanrah pynban ïa ka jingsahkut bad ka jinglang jong ki jaboh-jabaiñ ha ki nala.
“Ka jingthmu jong ki kontraktor ka long beit tang ban pynpoi ïa u pipe ha phyllaw jong kano-kano ka longïing hynrei kam don kano-kano ka jingïatreilang bad kane ka pyni ïa ka jingleh donbor jong ki”, ong u Bah Khrawkupar.
Shuh shuh u la ong, ba ka seng kan nym ailad ïa ki kontraktor ba kin shu shna tang dep bad ban shu pynsahkut beit ïa ka kam kumne hynrei ki dei ban wan mih hapoh ka dong ban peit bad bishar bniah hashwa ban shna.
Ka seng ka la dawa ruh na ki kontraktor kiba pyntrei ïa kane ka umbam-umdih ba kin wan mih hadien ka ar taïew bad lada kim wan mih, ka seng kan sa shim da kiwei pat ki sienjam.
