New Delhi, Nailur 10
Ka Sorkar Jylla ha ka Sngi Ba-ar ka la pyllait ïa ka ‘EasyLottery.In’, ka ‘lottery’ banyngkong eh ka India katkum ka juk stad mynta (digital) ha ryngkat ka jingdonlang u Myntri Rangbah ka Jylla, Conrad K. Sangma, Commissioner & Secretary – ERTS, Parvin Bakshi (IAS), Director ka Meghalaya State Lottery, ka M. S. N. Marak lem bad kiwei-kiwei.
Ha kane ka sngi, ka website https://easylottery.in/ ruh ka la leit ‘live’ bad ha ryngkat ka khusnam T.50,00,00,000/-, (50 klur) sha kiba wan banyngkong, ka ‘EasyLottery.in’ ka kular ban wanrah jingkylla haba phai sha ka jingkhuid-jingsuba ha ka jingïalehkai ‘Lottery’ – naduh ka jingthied tiket haduh ka jingpyllait pisa.
U Myntri Rangbah haba ai jingkren u la ïaroh ïa ki sienjam kiba la shim ha ka ban wanrah ïa ka khuid ka suba bad ka jingtbit ha ka liang ki kam ïalehkai ‘Lottery’ da kaba wanrah ruh ïa ka bynta ba ïadei bad ka ‘digital’.
U la ong ruh ba ka jingïalehkai ‘Lottery’ ka shong ha ka bok/nusib bad ka lad jied ‘digital’ kaba shai kum ka ‘EasyLottery’ ka shah ïa ki ‘riew shimet bad ka imlang-sahlang ban myntoi.
Na ka liang ka Director ka Meghalaya State Lottery, ka M. S. N. Marak ka la ong, “Wat hapdeng ka jingbun paid kum ma ngi bad kum kawei na ki ri kaba la jam shakhmat ha ka pyrthei ha ka jingkup bor katkum ka juk stad ba mynta (digital), ka India ka la don ka jingduna kaba paw ha ka liang ka ‘Lottery’ jong ka haduh mynta.”
Haba kdew ba ka jingpyllait ïa ka ‘EasyLottery’, ka don ka jingpyrshang ban pyndap ïa ki jingduna, ka la ong, “Ka jingdie ïa ki tiket jong ngi, ka jingsiew khusnam bad khajna yn sa leh beit katkum ka juk stad mynta (digital).”
“Tang kawei ka bynta jong ka jingkylla jong ngi naduh ka jingdie haduh ka jingai khusnam ka bym leh katkum ka juk stad mynta (digital) ka dei ka ‘Lottery Draw’. Kane ka dei namar ba ngi la jied ban pyndonkam ïa ka rukom kaba shaniah bad ba shai tam, kata ka rukom kaba pyndonkam da ki ‘motor’ ha kaba ym lah ban pyndonkam ïa ka mashin bad kumta ki jingmih na ka ‘Draw’ kan long tang katkum ka bok/nusib.”
Shuh shuh u Commissioner & Secretary – ERTS, Parvin Bakshi (IAS), u la bynrap, “Da ka ‘EasyLottery’, ngi pynleit jingmut ha ki lai tylli ki bynta…ka jingshaniah, ka jinglong khuid bad ka aiñ. Ngi wanrah ïa ka sha ki briew jong ka ri hadien ka jingwad bniah kaba jylliew. Kane ka rynsan bathymmai kan pynkylla dur ïa ka rukom ïalehkai ‘Lottery’ ha India, bad kan pynduh ruh ïa kano-kano ka jait jingleh thok ha ka liang ka pisa kaba ïadei bad ka kam ‘Lottery’. Ka ‘EasyLottery’ kan buh hakhmat eh ïa ka imlang-sahlang bad ki briew jong ka, khlem da ïapeiñ ïa ka bynta ba sngewtynnad na bynta ki nongkyrshan bad ki jingmyntoi na ka bynta ka Sorkar.”
