Mawkyrwat, Nailur:
U MLA ka Mawkyrwat Constituency u Bah Renikton Lyngdoh Tongkhar ha ka 9 tarik u Nailur 2024 u la pyllait paidbah ïa ka MLA scheme jong u snem 2023-24 sha ki paidbah jong ka Mawkyrwat Constituency kiba kot baroh sha ka T.2 klur 58 lak hapoh ophis treikam jong ka UDP ha Mawkyrwat, South West Khasi Hills District.
Kine ki skhim kiba u MLA u la ïoh ban pyllait paidbah ki long na ka Special Rural Work Programme (SRWP), Intensive Arts & Culture Development Programme (IACDP), Development of Traditional Folk Music (DTFM) bad ka Intensive Sports & Youth Development Programme (ISYDP).
Baroh ki jait skhim kiba la pyllait ki long 57 tylli kiba kynthup ïa ki ïing skul, ki surok, ki jingkieng kjat, ki pung saitjaiñ, ki madan bad kiwei kiwei bad ha kaba ïadei bad ki skhim shimet, u MLA u la ïoh ïarap kyrpang ïa ki 702 ngut ki nongrep mar T.15 hajar na ka bynta ban kyntiew ïa ka rep ka riang kumjuh ruh ïa ki 200 tylli ki longïing da ki tin sop ïing, ki kor suhjaiñ, ki tiar misteri, ki kali kit metïap bad kiwei kiwei kiba u la thoh shai ha ka jaiñ (flex) ïa ki kyrteng jong baroh ki nongïoh bynta.
Haba kheiñ lang baroh ki nongïoh jingmyntoi na ka MLA skhim jong u snem 2023-24 kiba kynthup ïa ki riew shimet, ki skul, ki shnong, ki Balang bad kiwei kiwei ka la poi sha ka shi hajar ki nongïoh bynta.
U Bah Renikton haba ai jingkren ha kane ka sngi u la ai khublei ïa ki tnat ophis sorkar bapher bapher kiba la donkti lang ban pynbeit ïa kine ki skhim, kumjuh ruh u la ai khublei ïa ki nongïoh bynta baroh kiba la ap la kham slem ban ïoh pdiang ïa ka MLA skhim.
U la pynpaw ba wat la ka long kaba rit hynrei u da kwah eh ba kan long ka jingmyntoi ïa ki paidbah bad u da angnud ba shispah na ka shispah kane ka jingai skhim kan leit beit sha kito kiba dei hok ban ïoh.
Ha kawei ka liang, u Bah Renikton u la pynpaw ïa ka jingbynñiaw namar teng-teng ki paidbah ki shah ïalam bakla ha kaba bunsien ki tharai beit ba kiei kiei kiba wan lyngba ka sorkar ki dei kiba wan na ka jingbamsap.
Kumta na ka liang u Bah Renikton u la buh ka jingkyntu ïa ki paidbah ba ki dei ban pynbeit ïa ki jingmut jingpyrkhat ym ban shu pyrkhat sniew ïa kiei-kiei baroh. U la kyntu ruh ïa kito ki paidbah bad ki shnong ki bym pat ïoh ba kin long kiba ïaishah bad don ka mynsiem ïatreilang ym ban don ka mynsiem bishni.
Ha kane ka sngi la ïadon lang u Bah Kynsai Diengdoh, Bah Khlainbor Malngiang napoh ophis jong u Block Development Officer ka Mawkyrwat, Bah SK Budnah Chairman MPDA, Bah Phrangkupar Khar Syiemiong Secretary MPDA, Bah J Nongsiej, ki riew rangbah lem bad ki paidbah.
