Nongpoh, Nailur 10
Ha kawei ka jingjia ha ka miet Lah Sngi U Blei, ar tylli ki dukan kiba don hapdeng ka sor Nongpoh, ki la shah prong tuh ha ki runar ki bym ithuh satia ki dei kiei kiba la ïoh ban rong ïa ka pisa bad pynpra dusmon ruh ïa ki tiar ki tar kiba don hapoh jong kitei ki dukan.
Kawei na kitei ki dukan kaba la shah prong tuh ha ki runar ka dei kaba la tip kyrteng kum ka Moon Light Studio, katba kawei pat ka dei dukan die marbam mardih bad kiwei kiwei ki tiar khutia-mutia kiba la long trai da u Tuta Miah.
Katkum ka khubor ba la ïoh lum, la ïathuh ba ki runar ki la prong tuh ïa kitei ki ar tylli ki dukan ha ka por shiteng synñia jong ka miet Lah Sngi U Blei da kaba kyndang jubor ïa ki jingkhang nar (shutter) jong kitei ki dukan bad ïoh ban rong ïa ka pisa kaba la buh hapoh katei ka dukan die marbam mardih, katba ïa ki tiar ki tar jong katei ka Moon Light Studio, kitei ki runar, ki la shu pynpra dusmon.
Halor kane ka jingjia, ki trai jong kitei ki dukan, ha ka Sngi Ba-ar, ki la leit ban buh da ka ejahar ha thanat Nongpoh. Na ka liang ki bor pulit ruh mar-mar ki la wan ban pynlong ïa ka jingtohkit ban lapdien bad ïoh kem ïa ki runar kiba donkti ha kane ka kam.
